बुधबार कोभिडबाट ३० जनाको मृत्यु, २८ सय संक्रमित थपिए

काठमाडौं । पछिल्लो २४ घण्टामा मुलुकमा २८३८ जना कोभिड बिरामी थपिएका छन् । स्वास्थ्य तथा जनसंख्या मन्त्रालयका अनुसार बुधबार १२ हजार ६१ नमुना परीक्षण गर्दा ती संक्रमित थपिएका हुन् ।

बुधबार थप ३० जनाको मृत्यु पुष्टि भएको छ । पछिल्लो २४ घण्टामा १४७५ जना निको भएका छन् ।

काठमाडौं उपत्यकामा ६९७ जना संक्रमित थपिएका छन् । काठमाडौं जिल्लामा मात्र ४९० जनामा संक्रमण पुष्टि भएको छ ।

आज संक्रमण दर २२ प्रतिशत छ । सबैभन्दा बढी संक्रमण दर सुदूरपश्चिममा ४८.२ प्रतिशत, कर्णालीमा ४६ प्रतिशत, गण्डकीमा ३२ र प्रदेश १ मा ३१ प्रतिशत संक्रमण दर छ ।

आजसम्म मुलुकमा २६ हजार ८३२ जना सक्रिय संक्रमित छन् । १२ जिल्लामा सक्रिय संक्रमित संख्या ५०० भन्दा माथि छ । स्वास्थ्य मन्त्रालयका सहप्रवक्ता समीरकुमार अधिकारीले साउन लागेसँगै संक्रमितको संख्यामा पनि वृद्धि भएको जनाए ।