साइबर सेनासँग सहकार्य गरेर एमालेविरुद्ध लाग्ने बुद्धिजिवीलाई ठेगान लगाउने महेश बस्नेतको चेतावनी

काठमाडौं । नेकपा (एमाले)का नेता महेश बस्नेतले युथफोर्सप्रति पार्टी बाहिर र भित्रैबाट पनि आशंका पालिएको भन्दै त्रसित नुहन आग्रह गरेका छन् । शनिबार युथफोर्सको भ्याली कमाण्ड घोषणा कार्यक्रमलाई सम्बोधन गर्दै उनले भने, ‘युथफोर्स फेरि जन्मिएको छ । पार्टी भित्र र बाहिबाट आशंका पालिएको छ । धेरै त्रसित नुहुनका लागि आग्रह गर्दछु ।’

युवासंघका इन्चार्ज समेत रहेका बस्नेतले यथुफोर्सले बन्दुक बोकिरहनु नपर्ने र गलत काम गर्नेका लागि मुड्की नै काफी हुने चेतावनी दिएका छन्। ‘युथफोर्सले कुनै बन्दुक बोक्नुपर्दैन, लालसलाम गर्ने यो मुड्की काफी छ,’ उनले भने, ‘मित्रहरुलाई यो हातले सलाम गर्छ, विरोधीलाई यो काफी छ ।’

युथफोर्सले सरकारसँग सहकार्य गरेर रचनात्मक काम गर्न तयार रहेका बताए । बस्नेतले भने, ‘युथफोर्स देउवा सरकारविरुद्ध बनेको होइन । हाम्रो सरकारले गरेका राम्रा कामअघि बढाउने काम गर्यो भने सहकार्य गर्न तयार छौं । रचनात्मक बन्न तयार छौं ।’

उनले आफ्नो पार्टीविरुद्ध लाग्ने बुद्धिजीवीलाई साइबसर सेनासँग मिलेर ठेगान लगाउने चेतावनी दिए । ‘बुद्धिजीवीविरुद्धको संगठन होइन,’ बस्नेतले भने, ‘ बुद्धिजीवीको नाममा कुनै पार्टीको प्रतिनिधि बनेर हाम्रो पार्टीविरुद्ध बिष ओकल्नेलाई युथ फोर्सले साइबर सेनासँग मिलेर बौद्धिक अराजकतावादीहरुलाई ठिक ठाउँमा राख्ने छ।’

उनले युथ फोर्स कुनै अदालतविरुद्ध खोलिएको संगठन होइन नभएको समेत बताए। बस्नेतले युथफोर्स माधव नेपालविरुद्ध नभई माधव नेपाल प्रवृत्तिविरुद्ध रहेको समेत बताए।