प्रदीप ज्ञवालीको विश्लेषण- एमाले फुट्दैन तर केही नेता छुट्न सक्छन्

रूपन्देही । नेकपा एमालेका प्रवक्ता प्रदीप ज्ञवालीले कार्यदलबीच भएको १० बुँदे सहमतिको जगमा पार्टीलाई एकतावद्ध बनाइने बताएका छन् । एमाले नफुट्ने दावी गर्दै ज्ञवालीले केही प्रमुख नेताहरू भने छुट्न सक्ने बताए ।

प्रेस चौतारी नेपालले गुल्मीमा आयोजना गरेको पत्रकार भेटघाटमा ज्ञवालीले पार्टीमा बाटो बिराएका र गल्ती गरेकालाई एकताको पक्षमा ल्याउन निकै कसरत भए पनि केही नेताज्युहरू गठबन्धन धाएर परपर सरेको टिप्पणी गरे । पार्टी विभाजनले कसैलाई पनि फाइदा नभएको उदाहरण नेपालमै भएको भन्दै उनले पार्टी फुट्नेभन्दा पनि केही नेता छुट्ने संभावना बढी भएको बताएका छन् ।

अदालतले प्रधानमन्त्री नियुक्ति गर्ने नजिर शुरू गरेर बहुदलीय व्यवस्था मास्ने खेल सुरू भएको नेता ज्ञवालीको आरोप छ । ‘केही पार्टी र नेतालाई जनताभन्दा अदालतको बढी विश्वास गर्ने भएकाले अदालत त्यसैमा फसेर बहुदलीय प्रणाली मास्ने खेल शुरू भएको छ’, उनले भने, ‘स्वार्थको गठजोडबाट बनेको सरकारसँग जनताका आशा र अपेक्षा पूरा गर्ने कुनै मुद्दा छैन ।’

विभिन्न कार्यक्रमको सन्दर्भमा गृहजिल्ला आएका ज्ञवालीले निर्वाचन क्षेत्रमा भएका अस्पताल, सडक, खानेपानी, विद्यालय लगायतका विकास पूर्वाधारको विषयमा अनुगमन गरेका छन् ।