एमाले एकताका लागि १० बुँदे कार्यान्वयनको नेतृत्व लिन कार्यदललाई सांसदहरूको आग्रह (भिडियो)

काठमाडौं । नेकपा एमालेबाट निर्वाचित प्रतिनिधिसभा सदस्यहरुले विघटित कार्यदलले तयार पारेको १० बुँदे प्रस्ताव अबिलम्ब कार्यन्वयनको माग गरेका छन् ।

आइतबार १० सदस्यीय विघटित कार्यदलका नेताहरूसँगको छलफलपछि लिखित प्रस्ताव पारित गर्दै सांसदहरुले १० बुँदे कार्यन्वयनको नेतृत्व लिन आग्रह समेत गरेका छन् ।

केपी ओली र माधव नेपाल दुवै समूहका सांसदहरूको सहभागिता रहेको छलफलको संयोजन यज्ञराज सुनुवारले गरेका थिए भने लिखित प्रस्ताव कृष्णप्रसाद दाहालले पेस गरेका थिए ।

कार्यदलका दुवै संयोजक भीम रावल र सुवास नेम्वाङले १० बुँदे सहमति गर्दाको मेहनत र यसले पार्टीलाई एक बनाउन गर्ने सहयोगबारे बताएपछि सांसदहरूको तर्फबाट कार्यदललाई धन्यवाद दिइएको छ ।

पार्टी एकताको लागि पारित गरेको १० बुँदे प्रस्तावले एमालेका आन्तरिक समस्या समाधान गरि पार्टी एकता गर्न सकिन्छ भन्ने साझा बुझाइ आफूहरूको रहेको सांसद सुनुवारले बताए ।

सांसदहरूको भेलाले १० बुँदे सहमति अविलम्ब प्रभावकारी कार्यान्वयनका लागि सार्थकम पहलकदमी लिन कार्यदलका सदस्यहरूलाई आग्रह गरेको दाहालले बताए ।