भारतका दुई राज्यको सीमामा झडप, ६ जना प्रहरीको मृत्यु

एजेन्सी। भारतको असम-मिजोरम सीमा क्षेत्रमा हिंसात्मक झडप हुँदा आसाम राज्यका ६ जना प्रहरीले ज्यान गुमाएका छन् । दुई राज्यको सीमा क्षेत्रमा मिजोरम तर्फबाट आएका केही अराजक समूहले ढुँगामुढा गरेको आसाम प्रहरीले आरोप लगाएको छ ।

आसाम प्रहरीले शुरुमा ढुँगा मुढा गरेको समूहबाट फायर खोलेको र झडपमा आफ्नो तर्फका ६ प्रहरी मारिएको जनाएको छ । यस घटनालाई लिएर दुबै राज्यका मुख्यमन्त्रीहरुले एकले अर्कालाई दोष लगाएका छन् ।

आसामका मुख्यमन्त्री हिमत विश्व शर्माले आफ्नो राज्यका ६ जना प्रहरी जवानले सीमानामा भएको झडपमा ज्यान गुमाएको बताएका छन् ।

मुख्यमन्त्री शर्माले सामाजिक सञ्जाल ट्वीटमा भनाई पोष्ट गर्दै आसाम प्रहरीका ६ जवानले राज्यको संवैधानिक सीमाको रक्षा गर्दागर्दै आफ्नो जीवन दिएको उल्लेख गरेका छन् । ‘मलाई ठूलो चोट लागेको छ । आसाम पुलिसका ६ जना बहादुर जवानहरुले हाम्रो राज्यको संवैधानिक सीमाको रक्षा गर्दागर्दै आफ्नो जीवन दिएका छन् । मारिएका प्रहरी जवानका परिवारप्रति संवेदना छ ।’ मुख्यमन्त्री शर्माले ट्वीटरमा लेखेका छन् ।

उता मिजोरम राज्यका गृहमन्त्री लालछमलियानाले आसाम प्रहरीका केहि जवानहरु मिजोरम राज्यको प्रहरी पोष्ट र सीआरपीएफको पोष्ट हुँदै जबर्जस्ती  प्रवेश गरेको बताएका छन् । मिजोरम राज्यको सीआरपीएफ र प्रहरीसँग भनाभन् भइरहेको अवस्थामा मिजोरम राज्यका स्थानीयबासीले प्रतिकार गर्न खोज्दा सो घटना घटेको गृहमन्त्री लालछमलियानाले बताए । उनले प्रतिकारमा आएका निशस्त्र आएका स्थानीयबासी माथि आसाम प्रहरीले लाठी चार्ज, अश्रुग्याँस र गोली प्रहारसमेत गरेको आरोप लगाएका छन् ।

मिजोरम राज्यको सीआरपीएफका एडीजी संजीव रंजन ओझाले अग्लो स्थानमा रहेको मिजोरम प्रहरी र स्थानीयमाथि आसाम प्रहरीले केहि अश्रुग्याँस छाडेसँगै हिँसा भड्केको बताए । ‘दुबै तर्फबाट फायर खोलेपछि असम प्रहरीका ६ प्रहरीले ज्यान गुमाए,’ एडीजी ओझाले भने ।

दुबै राज्यका मुख्यमन्त्रीहरुले केन्द्र सरकारको हस्तक्षेपको माग गरेका छन् । केन्द्र सरकारले दुबै राज्यका सीआरपीएफलाई बल प्रयोग गरी शान्ति बहाली गर्न निर्देशन दिए पछि दंगा शान्त भएको छ ।

केन्द्र सरकारका गृहमन्त्री अमित साहले दुबै राज्यका मुख्यमन्त्रीहरुलाई सीमानाका बाट आ-आफ्नो प्रहरी फर्काउन आग्रह गरेपछि सीमामा तनाव कम भएको थियो ।