बालबालिकालाई खोप लगाउन सरकारले फाइजरसँग ६० लाख डोज खरिद गर्ने

काठमाडौं । १२ देखि १८ वर्ष उमेरका बालबालिकालाई लक्षित गर्दै सरकारले ६० लाख डोज फाइजर खोप खरिद गर्ने भएको छ ।

अमेरिकाको फाइजर एन्ड बायोटेक कम्पनीले उत्पादन गरेको खोप खरिद गर्न सरकारले कम्पनीसँग सम्झौता पनि गरेको छ । उक्त उमेर समूहका ५० लाख जनसंख्यालाई लक्षित गर्दै फाइजर खोप खरिद गर्न लागिएको हो ।

स्वास्थ्य सचिव लक्ष्मण अर्यालका अनुसार बालबालिकाका लागि आवश्यक १ करोड डोजमध्ये थप ४० लाख कोभ्याक्स संयन्त्रमार्फत ल्याइने भएको छ । ‘६० लाख डोज खोप खरिद गर्न फाइजरसँग सम्झौता भैसक्यो’ अर्यालले भने ।

आगामी बैशाखसम्म खोप उपलब्ध गराउने फाइजरले जनाएको छ । फाइजरका लागि खोप खरिद गर्न आवश्यक रकम प्रबन्ध गर्न विश्व बैंकसँग ऋण सम्झौताको तयारी भएको उनले जनाए ।