बढ्यो आरजुको कुटनीतिक र प्रशासनिक सक्रियता, सचिवहरूसँग ‘डिनर ब्रिफिङ’

काठमाडौं । लामो समय जापान बसेर फर्किएकी कांग्रेस नेतृ तथा प्रधानमन्त्री पत्नी आरजु देउवा राणाले राजनीतिक तथा प्रशासनिक सक्रियता बढाएकी छन् ।

कांग्रेस महाधिवेशन केन्द्रित भएर राजनीतिक सक्रियतामा रहेकी राणाले शेरबहादुर देउवा प्रधानमन्त्री भएपछि प्रशासनिक क्षेत्रको समेत ब्रिफिङ लिन थालेकी छन् ।

दुई दिनअघि राणाले नेपाल सरकारका केही सचिव र महत्वपूर्ण विभागका महानिर्देशकहरुसँग ललितपुरको भिभान्ता होटलमा डिनर बैठक आयोजना गरी ब्रिफिङ लिएको स्रोतले जनाएको छ ।

राणा यसअघि देउवा प्रधानमन्त्री हुँदा पनि सचिवलगायत प्रशासनिक क्षेत्रको सरुवा बढुवामा हावी हुने गरेकी थिइन् । विभिन्न मन्त्रालयका सचिवहरूको सरुवा र हेरफेर हुन लागेका बेला राणाले सामूहिक र एक्ला एक्लै भेटघाट बढाएको स्रोतले जनाएको छ ।

राणाले कूटनीतिक सक्रियता पनि बढाउन थालेको निकट स्रोतले जनाएको छ । विशेषगरी भारतसँग बिग्रिएको भनेको देउवाको सम्बन्ध सुधारका लागि उनले भारतीय संस्थापन पक्षका संयन्त्रहरुसँग समन्वय गरिरहेको उनीनिकट एक कांग्रेस नेताले बताए ।

कांग्रेस महाधिवेशनमा देउवालाई बलियो बनाउन राणाले पार्टीभित्र र अन्यत्र पनि आफ्नो सक्रियता बढाएकी हुन् ।