कोरोना प्रभावित फिल्म क्षेत्रलाई राहत दिलाउन अर्थमन्त्रीलाई ज्ञापन

काठमाडौं । कोभिड-१९ अति प्रभावित फिल्म क्षेत्रलाई मौद्रिक नीतिमार्फत आर्थिक राहतको व्यवस्था गर्न आग्रह गर्दै चलचित्र निर्माता संघले अर्थमन्त्री जनार्दन शर्मालाई ज्ञापन बुझाएको छ ।

फिल्म उद्योगलाई बचाइराख्न तीनवर्ष पछाडिबाट सावाँ ब्याज बुझाउन सुरु गर्ने गरी १० वर्षका लागि सुलभ, सहुलियत, ३ प्रतिशत सम्ममा कर्जा व्यवस्थापन गर्न आग्रह गरिएको छ ।

लकडाउन अवधिभर व्याजमा छूट दिन समेत गरिएको छ । फिल्म निर्माणमा बैंकिङ कर्जाको व्यवस्था, ५०० डलरसम्म डेविड भिसा कार्डको व्यवस्था गर्न माग गरिएको छ ।

यस्तै, आर्थिक वर्ष ०७८–०७९ को बजेटमा परेकाको कार्यान्वयन र छुटेकालाई पुनर्विचार गर्न समेत आग्रह गरिएको छ । महामारीपछि फिल्म छायांकन र प्रदर्शनमा फर्कन सहजीकरण गर्नेबारे पनि छलफल भएको छ ।

भन्सार छूट, विद्युत डिमान्ड चार्ज छूट हुनुपर्ने, विदेशमा फिल्म फेस्टिभल आयोजनाका लागि बजेट विनियोजन गर्नुपर्ने, उपत्यकाभित्र सुविधा सम्पन्न इन्डोर सुटिङ स्टुडियो निर्माण गर्नुपर्ने लगायतका माग छन् ।

प्रस्तुत मागमा अर्थमन्त्री शर्मा सकारात्मक रहेको निर्माता संघका अध्यक्ष आकाश अधिकारीले जानकारी दिए ।