बैठकबाट निस्कँदै वरिष्ठ उपाध्यक्षले भनेः प्रशिक्षकले अनुशासन तोड्नुभयो, एन्फाले बोल्ड निर्णय गर्नुपर्छ

काठमाडौं । फुटबल प्रशिक्षकको राजीनामाका विषयमा छलफल गर्न बसेको एन्फा कार्यसमिति बैठकबाट वरिष्ठ उपाध्यक्ष पंकजविक्रम नेम्वाङ पनि बाहिरिएका छन् । बाहिरिने क्रममा पत्रकारसँग कुरा गर्दै उनले एन्फाले बोल्ड निर्णय गर्नुपर्ने बताए ।

नेम्वाङले भने, ‘संस्थाले बोल्ड निर्णय गर्न सक्नुपर्छ । प्रशिक्षकको दवावमा आएर संस्थाका मान्छेहरुले केही नबोल्ने भएपछि नेपाली फुटबलको सर्वोच्च संस्थाको नेतृत्व गर्छौं कसरी भन्ने ?’

प्रशिक्षक अल्मुताइरीले नेम्वाङलाई आरोपित गर्दै राजीनामाको घोषणा गरेका थिए । नेम्वाङले आफूविरुद्ध प्रशिक्षकले लेख्नुको कारण थाहा नभएको बताए । प्रशिक्षकले अनुशासन तोडेको आरोप लगाउँदै राजीनामा दिन्छु भनेर नाटक मञ्चन गरेको उनले बताए ।

‘कर्मचारीले संस्थाको वरिष्ठ उपाध्यक्षलाई बिना आधार आरोप लगाउनु अनुशासनहिन कुरा हो,’ उनले भने, ‘त्यसैले मैले छानविनको माग गरेको हो । एन्फाले न्यायसंगत निर्णय गर्नुपर्छ ।’

उनले थपे, ‘अहिलेसम्म राजीनामा दिन्छु भनेर दिनुभएको छैन । उहाँले लेखेको शब्दले मेरो व्यक्तिगत जीवनमा, परिवारले गालीगलौज सुन्नुपरेको छ । यतिका वर्ष फुटबलमा गरेको योगदानमा कालो धब्बा लागेको छ । मैले गल्ति गरेको-नगरेको एउटा ठाउँमा छ । विदेशी प्रशिक्षक हो भन्दैमा जे पायो त्यही गर्न छुट दिनुभएन ।’

नेम्वाङले यसको समाधान चाँडोभन्दा चाँडो निकाल्नुपर्नेमा जोड दिएका छन् ।