कोरोना रोकथामका लागि सरकारले सयदिने योजना ल्याउँदै, एकसाताभित्र थप ३२ लाख डोज खोप आउँदै

काठमाडौं । कोरोनाभाइरस महामारी नियन्त्रणका लागि सरकारले एकसय दिने कार्ययोजना ल्याउने भएको छ । गृह मन्त्रालयमा बसेको गृहमन्त्री बालकृष्ण खाँड, स्वास्थ्य राज्यमन्त्री उमेश श्रेष्ठसहितको सरकारी अधिकारीको बैठकले नागरिकसँगको सहकार्यमा कार्यक्रम ल्याउने निर्णय गरेको हो ।

तेस्रो लहर आउनुअघि नै सरकारले आवश्यक तयार गरिसक्ने निर्णय उक्त बैठकले गरेको छ । विदेशबाट आएकाहरुलाई राख्न मिल्ने होल्डिङ सेन्टर निर्माणलाई तीव्रता दिने निर्णय पनि बैठकले गरेको छ ।

नेपाल–भारत सीमा क्षेत्रमा कोभिडविरुद्धको खोप लगाउन पनि स्वास्थ्य राज्यमन्त्री श्रेष्ठले आग्रह गरेका छन् । सबै सरकारी अस्पतालमा अक्सिजन व्यवस्थापन गर्ने निर्णय पनि बैठकले गरेको छ ।

सरकारले आज सोमबार सय दिने कार्ययोजना सार्वजनिक गर्ने तयारी गरेको छ । स्वास्थ्य मन्त्रालयमा सचिव लक्ष्मण अर्याल र प्रमुख विशेषज्ञ महेन्द्र श्रेष्ठको बिदाइ कार्यक्रममा सरकारले सय दिने कार्ययोजना सार्वजनिक गर्ने तयारी गरेको छ ।

४० लाख डोज फाइजर खोप खरिद गर्नको लागि आवश्यक प्रबन्ध गर्ने तयारी भएको समेत उनले जनाए । जापानबाट १६ लाख डोज र चीनबाट १६ लाख गरी एक साताभित्र ३२ लाख डोज खोप आउने जानकारी समेत स्वास्थ्य राज्यमन्त्रीले दिए ।