महेश बस्नेतको व्यंग्य कविता : मन्त्री बनाउन पनि परमादेश जारी गराऊ (भिडियो)

काठमाडौं । नेकपा एमालेका सांसद महेश बस्नेतले प्रधामन्त्री शरबहादुर देउवाले मन्त्रीपरिषद् विस्तार गर्न नसकेको विषयलाई लिएर व्यंग्य कसेका छन् । उनले सरकार बनाउन जस्तै मन्त्री बनाउन पनि सर्वोच्च अदालतको परमादेश माग गर्न सुझाव दिए ।

आजको संसद बैठकमा शून्य समय लिएर बोल्दै सांसद बस्नेतले कवितात्मक शैलीमा आफ्नो भनाइ राखेका थिए । उनको ‘व्यंग्य कविता’ यस्तो थियो :

एसएसबीले तुइन काटे
जयसिंह धामी महाकालीमा डुबे
सरकार भन्छ मौन बस, समाचार नबनाउ
प्रधानमन्त्री भन्नुहुन्छ खोप खोप खोप…
कांग्रेसका मेयरको घरमा खोप
उपसभापतिको घरमा खोप
होटलमा सत्तापक्षका कार्यकर्तालाई खोपैखोप
जनता दिनभरि लाइनमा खोप न सोप
विचरा सरकार व्यापारी मन्त्री बनाउँछ
दक्ष सचिव फेर्छ
देशभर बाढीपिडित जनता राहत नपाएर कराउँछन्
कांग्रेसका विपक्षी मन्त्री नपाए सत्तामा जान्न भन्दैछन्
कांग्रेसका वडाध्यक्ष नगरपालिकाको कार्यालय फोड्दैछन्
माओवादी जसपा भन्दैछन्- मन्त्री संख्या नबढाए सांसदले आत्महत्या गर्ने भए
दिमागमा आतंक ल्याए, भुकम्प ल्याए
परमादेशबाट बनेको सरकार
तीन हप्ता भइसक्यो मन्त्रीपरिषद् बनेन
न्यूनतम सझा कार्यक्रम आएन
प्रधानमन्त्रीज्यू, अब बेरोजगार भएका त्रिपाठीहरुलाई अदालत पठाउनुस्
फलानो पार्टीका फलानो सांसदलाई मन्त्री बनाइपाउँ भनेर परमादेश जारी गराउनुस्
नत्र जनादेशबिनाको सरकार चल्लाजस्तो देखिएन
अब जनता भन्दैछन्
केपी बा आइलभ यू…

उनको व्यंग्यं कविता पुरा नभइकन सभामुखले माइक काटिदिएका थिए ।