मुस्ताङ र मनाङका शतप्रतिशत नागरिकले लगाए कोभिडविरुद्धको खोप
![](https://www.nepalpress.com/wp-content/uploads/2020/11/nepalpress-logo-n.png)
![](https://www.nepalpress.com/wp-content/uploads/2021/05/second-dose-vaccine_02.jpg)
चामे । हिमालपारीको जिल्लाहरु मनाङ र मुस्ताङमा सम्पूर्ण योग्य नागरिकले कोभिड–१९ विरुद्धको खोप लगाएका छन् । योसँगै मनाङ र मुस्ताङ आफ्ना जनसंख्यालाई शतप्रतिशत खोप लगाउने मुलुककै पहिलो जिल्ला बनेका छन् ।
ती दुई जिल्लामा माघ १४ गतेदेखि खोप लगाउन सुरु गरिएको थियो । जिल्ला स्वास्थ्य कार्यालय मनाङका प्रमुख बद्री आचार्यका अनुसार त्यहाँ १८ वर्ष भन्दा माथिका ४,१९८ जनाले खोप लगाएका छन् ।
जसमा कोभिसिल्ड २,०९६ जना, भेरोसेल ७५ जना र जोन्सन एन्ड जोन्सन २,०२७ जनाले लगाएका छन् । खोप लगाउन योग्य रहेका बाँकी नागरिक जिल्ला बाहिर रहेकाले लगाउन नसकिएको आचार्यले बताए ।
यस्तै, मुस्ताङमा ९ हजार ५०८ जना नागरिकले खोप लगाएको जिल्ला स्वास्थ्य कार्यालय मुस्ताङले जनाएको छ । मुस्ताङमा जोन्सन एण्ड जोन्सन ६ हजार ७१५ जना र भेरोसेल खोपको पहिलो र दोश्रो डोज ३ सय ३२ जनाले लगाएका छन् भने पहिलो चरण र दोस्रो चरणको खोप २ हजार ४७२ जनाले लगाएका छन् ।
जिल्ला स्वास्थ्य कार्यालय मुस्ताङका प्रमुख टीकाराम भण्डारीले जिल्लाका शतप्रतिशत नागरिकले खोप लगाइसकेको जानकारी दिए ।