म क्रिकेटबाट टाढिएको होइन, अब भूमिका बदलिने छः पारस खड्का

काठमाडौं । हालै सन्न्यास घोषणा गरेका क्रिकेटर पारस खड्काले आफू क्रिकेटबाट टाढा नहुने बताएका छन् । उनले आफफ्नो भूमिका भने अब बदलिने स्पष्ट पारे ।

सन्न्यास घोषणापछि पहिलोपटक पत्रकारहरूसँग प्रस्तुत हुँदै पारसले आफ्नो रुची व्यवस्थापनमा रहेको बताए । उनले भने, ‘म क्रिकेटबाट टाढिएको होइन, अब बेग्लै भूमिका हुन सक्छ । यो मैले धेरै सोचेर लिएको निर्णय हो ।’

पारसले अरु विषयमा सबैसँग सल्लाह लिने गरेको भए पनि क्रिकेट सम्वन्धी निर्णय आफू एक्लैले लिने गरको बताए । अहिले सन्न्यास लिन सही समय आफूले ठानेको उनको भनाइ छ । उनले भने, ‘मैले आफ्नो श्रीमती र परिवारलाई भनेको थिएँ । तर सल्लाह गरेको होइन कि जानकारी गराएको हुँ ।’

उनले क्रिकेटबाट यही तरिकाले सन्न्यास लिन्छु भन्ने पहिले देखि नै सोचेको बताए । नेपाली क्रिकेट यहाँसम्म आउनुमा आफ्नो मात्रै भूमिका नरहेको उनको भनाइ थियो । नेपालले टेस्ट स्टाटस पावस् भन्ने आफ्नो सपना रहेको पारसले बताए । उनले भने, ‘मेरो लाइफटाइममा नेपाल टेस्ट क्रिकेट खेल्ने राष्ट्र बनोस् भन्ने चाहन्छु ।’