युरो फाइनलपछि खेलाडीमाथि नस्लीय दुर्व्यवहार गर्ने ११ जना पक्राउ

एजेन्सी । अघिल्लो महिना सम्पन्न युरो–२०२० को फाइनलपछि इंग्लयाण्डला खेलाडीहरुलाई सामाजिक सन्जाल वा अनलाइनको माध्यमबाट नस्लीय भेदभावजन्य टिप्पणी गर्ने ११ जनालाई लण्डन प्रहरीले पक्राउ गरेको छ ।

बेलायतको फुटबल पोलिसिङ युनिटले दुर्व्यवहारको ६ सय भन्दा बढी निवेदन पाएको थियो । युरो फाइनलमा इटलीसँग पेनाल्टीमा पराजित भएपछि गोल गर्न नसक्ने तीन इंग्लिस काला खेलाडीमाथि रंगभेद भएको थियो । सामाजिक सन्जालमा प्रशारित १ सय २३ पोष्टमध्ये ३४ वटा बेलायतबाटै भएको थियो ।

गल्ती गर्नेहरुले सामाजिक सन्जालको एकाउन्ट बन्द गर्दैमा उन्मुक्ति पाउँछु भनेर नसोच्न प्रहरीले चेतावनी दिएको छ ।

इंग्ल्याण्डका मार्कस राशफोर्ड, जाडोन सान्चो र बुकायो साकाले युरो–२०२० को फाइनलमा इटलीविरुद्ध पेनाल्टीमा गोल गर्न नसकेपछि सामाजिक सन्जालमा अत्याधिक रुपमा नस्लीय दुर्व्यवहारका सन्देशहरु पोष्ट भएका थिए ।

यस घटनाको इंग्ल्याण्डको फुटबल एशोसियसन, इंग्लिस प्रशिक्षक ग्यारेथ साउथगेट र प्रधानमन्त्री बोरिस जोन्सनले भर्त्सना गर्दै निश्पक्ष छानविनको अपील गरेका थिए ।