भूमि आयोग खारेजीविरुद्ध सुकुम्बासी बस्तीबाट युवा संघको प्रदर्शन (तस्बिरहरू)

काठमाडौं । भूमि आयोग खारेज गर्ने देउवा सरकारको निर्णयविरुद्ध राष्ट्रिय युवा संघले प्रदर्शन गरेको छ ।

युवा संघका कार्यकर्ताले कालो ब्यान र प्लेकार्डसहित मनोहराको सुकुम्बासी बस्तीबाट जुलुस निकालेका छन् । केपी ओली नेतृत्वको सरकारले १२ लाख करिब १२ लाख भूमिहीन तथा सुकुम्बासीको समस्या समाधानको तयारी गरिरहेकोमा अहिलेको सरकारले आयोग नै खारेज गरेर जनघाती काम गरेको युवा संघको ठहर छ ।

मंगलबारको मन्त्रिपरिषद् बैठकले ओली नेतृत्वको सरकारले गठन गरेको भूमि आयोग खारेज गर्ने निर्णय गरेको थियो । राष्ट्रिय युवा संघका इन्चार्ज एवं एमाले नेता महेश बस्नेतले सुकुम्बासीलाई लालपूर्जा दिने अन्तिम अवस्थामा आयोग नै खारेज गरेकाले सो निर्णय फिर्ताका लागि सरकारलाई बाध्य बनाउन संघर्ष गरेको बताए ।

नेकपा एमालेले हिजो विज्ञप्ति निकालेर भूमि सम्बन्धी समस्या समाधान आयोग खारेजीको निर्णय अविलम्ब सच्याउन माग गरेको थियो ।  प्रवक्ता प्रदीप ज्ञवालीले भूमि आयोग खारेजीको निर्णयले संविधानले सुनिश्चित गरेको मौलिक हकको हनन गरेको र ऐन बमोजिम गठन भएको आयोज खारेजीले सरकार दलित र भमिहीनविरोधी रहेको पुष्टी भएको टिप्पणी गरेका छन् ।