लुम्बिनीमा विशेष अधिवेशन आव्हान, प्रदेश प्रमुखले एकपक्षीय निर्णय गरेको एमालेको आरोप

रूपन्देही । लुम्बिनी प्रदेशसभाको विशेष अधिवेशन साउन २७ गते बस्ने भएको छ ।

प्रदेशसभाका सचिव दुर्लभकुमार पुन मगरले सूचना जारी गर्दै संविधानको धारा १६३ (३) बमोजिम प्रदेश प्रमुख अमिक शेरचनले साउन २७ गते बुधबार दिउँसो १ बजे प्रदेश सभाको विशेष अधिवेशन आव्हान गरेको जानकारी गराएका हुन् ।

विपक्षी गठबन्धनले मुख्यमन्त्री शंकर पोखरेल नेतृत्वको सरकार अत्पमतमा रहेको भन्दै साउन १९ गते तेस्रोपटक अविश्वासको प्रस्ताव दर्ता गराएका छन् । लगत्तै विशेष अधिवेशनको लागि प्रदेश प्रमुखसमक्ष समावेदन दिएका थिए । तर, सत्तारूढ दल नेकपाले भने आपत्ति जनाएको छ ।

सरकारसँग कुनै सल्लाह नगरी, अदालतमा संसदका मुद्दाको किनारा नलागी प्रदेश प्रमुख र प्रदेशसभाले एकपक्षीय निर्णय गरेको प्रमुख सचेतक भूमिश्वर ढकालले नेपाल प्रेसलाई बताए । ‘यो विषयमा पार्टीमा थप छलफल गरेर अगाडि बढ्छौं’, उनले भने ।