माधवपक्षीय बैठकमा प्रेम आलेको प्रश्न- मैदानमा कमाण्डरलाई छाडेर सिपाही भाग्न मिल्छ ?

काठमाडौं । माधव नेपालपक्षीय एमाले केन्द्रीय कमिटी बैठकमा बिहीबार ५५ जना सदस्यले बोल्दा अन्तिम वक्ताका रूपमा प्रेम आले उभिए । आफू माधव नेपाल टिमको कान्छो सदस्य भन्दै आफूसँगै ओली टिम छाडेर आएकाहरूको राजनीतिक सुरक्षामा उनले जोड दिएका छन् ।

शेरबहादुर देउवालाई विश्वासको मत दिने बेला ओलीको साथ छाडेर माधव नेपालतर्फ लागेका आलेसँगै ७ जना सांसदले साथ दिएपछि माधव पक्षमा २२ सांसद पुगेका थिए । आलेले विश्वासको मत दिने बेला संसदबाट बाहिरिएका १० सांसद र राजीनामा दिएका भीम रावलमाथि पनि प्रश्न उठाएको एक सदस्यले बताए ।

आलेको भनाइ उदृत गर्दै ती सदस्यले भने, ‘माधव नेपाल हाम्रो कमाण्डर हो । युद्धको बेला कमाण्डरलाई मैदानमा एक्लै छाडेर सिपाही भाग्न मिल्छ ? फौजमा हो भने कोर्टमार्सल हुन्छ, म त्यो शब्द त प्रयोग गर्दिन तर सबै एकताबद्ध भएर माधव नेपालको पक्षमा उभिनुपर्छ ।’

नवौं महाधिवेशनमा माधव नेपाल प्यानलबाट केन्द्रीय सदस्य जितेका आले २०७४ सालको चुनावताकादेखि केपी ओली पक्षमा उभिएका थिए । उनलाई ओलीले ६ महिना वनमन्त्री बनाएका थिए ।

पछिल्लो समय ओलीसँग असन्तुष्ट रहेका उनी सातजना सांसदसहित माधव नेपाल पक्षमा लागेका थिए ।