धनुष सागर पोखरीमा भेटियो सन्तोषको शव

जनकपुरधाम । जनकपुरधामको ऐतिहासिक धनुष सागर पोखरीमा शुक्रबारदेखि बेपत्ता एक युवकको शव आज बिहान फेला परेको छ ।

जनकपुरधामकै कटैया चौरी घर भएका अन्दाजी ३५ वर्षीय सन्तोष सहनीको शव फेला परेको हो । पोखरीमा नुहाउने क्रममा उनी बेपत्ता भएका थिए ।

यूवक बेपत्ता भएको कुरा जानकारी पाएलगत्तै सुरक्षाकर्मीले पोखरीमा डुंगाको सहायताले खोजतलास गरेको थियो । आज बिहान पोखरीमा तैरिरहेको अवस्थामा उनको शव फेला परेको प्रहरीले जनाएको छ ।

उनको शव पोष्टमार्टमका लागि प्रादेशिक अस्पताल पठाइएको छ ।