भूमि आयोग तत्काल गठन गर्न कांग्रेस जिल्ला सभापतिहरूको माग

काठमाडौं । नेपाली कांग्रेसका जिल्ला सभापतिहरूको भेलामा भूमिसम्बन्धी आयोग तत्काल गठन हुनुपर्ने आवाज उठेको छ ।

कांग्रेस नेतृत्वमा सरकार गठन भएलगत्तै अघिल्लो सरकारले गठन गरेको देवी ज्ञवाली नेतृत्वको भूमि समस्या समाधान आयोग विघटन गरिएको थियो । नेकपा एमालेले भूमिहीनलाई जग्गा दिने बेलामा कांग्रेस सरकारले अवरोध गरेको आरोप लगाउँदै आएको छ ।

संस्थापनइतरका कांग्रेस जिल्ला सभापतिहरूको भेलामा आयोग विघटनपछि देशैभरी कांग्रेसविरुद्ध प्रचार भइरहेको भन्दै तत्काल भूमि आयोग गठन गर्नुपर्ने आवाज उठेको हो ।

मोरङ कांग्रेसका सभापति डिगबहादुर लिम्बुले तत्काल भूमि आयोग गठन नगरे कम्युनिष्टहरूले गलत सन्देश प्रवाह गर्ने बताएका छन् । उनले कार्यकर्ता भर्ती गर्न नभई वास्तविक भूमिहीनलाई जग्गा दिनसक्ने आयोग बनाउनुपर्ने बताएका हुन् ।

बैठकमा सहभागी एक नेताका अनुसार पार्टीको आन्तरिक विषयसंगै सरकारले गर्नुपर्ने कामकारवाही बारे पनि भेलामा आवाज उठेको छ । खाना सत्रअघि ९ जना जिल्ला सभापतिले आफ्नो धारणा राखेका छन् ।