ईपीएलको टाइटल स्पोन्सर–बजाज पल्सर

काठमाडौं । असोजमा हुने एभरेष्ट प्रिमियर लिग (ईपीएल)को टाइटल स्पोनसर बजाज पल्सरले गर्ने भएको छ । आगामी सेप्टेम्बरदेखि कीर्तिपुरस्थित त्रिवि क्रिकेट मैदानमा हुने ईपीएल १४ दिनसम्म चल्ने छ ।

ईपीएलमा ६ फ्रेन्चाइज टोलीहरू– विराटनगर वारियर्स, काठमाडौं किङ्ग्स–११, पोखरा राइनोज, ललितपुर प्याट्रिओट्स, चितवन टाइगर्स र भैरहवा ग्लाडिएटर्सले प्रतिस्पर्धा गर्नेछन् ।

आइतबार म्यारिओट होटेलमा ईपीएल र बजाज पल्सरबीच सम्झौता भएको छ । सम्झौतापछि गोल्छा ग्रुपका अध्यक्ष शेखर गोल्छाले नेपाली युवाले क्रिकेटलाई माया गरिदिएको र पछिल्लो समयमा क्रेज पनि बढेको र नेपालको सबैभन्दा ठूलो क्रिकेट प्रतियोगितालाई प्राियेजन गरेको बताए ।

‘यो एसोसिएसनले पक्कै पनि देशभरीबाट धेरै गुणस्तरीय खेलाडीहरूलाई जन्म दिनेछ’ उनले भने, ‘बजाज पल्सर नेपालमा खेलकुदको विकासका लगि हरदम प्रतिबद्ध छ ।’

यस्तै, ईपीएलका प्रबन्ध निर्देशक आमिर अख्तरले बजाज उत्कृष्ट ब्रान्ड रहेको बताए । ‘बजाज ब्रान्ड उत्कृष्टताको एक उदाहरण हो । र सत्य यो हो कि हामी ईपीएलमा लगातार उत्कृष्टताका लागि प्रयास गरिरहेका हुन्छौं ।’