फेरिएको छ

क्यालेन्डरको रंग र मसी

कागज र साइज फेरिएको छ

अक्षरको फन्ट फेरिएको छ

फेरिएका छन् पातै पिच्छेका

सानदार विज्ञापनहरू

फेरिइहरेको छ कर्पोरेट जगतको

विज्ञापनको स्टाइल

फेरिइरहेका आमाका अनुहारका

चाउरीएका रेखा र कपालको रंग

फेरिएका कुरा धेरै छन्

हाम्रो देशको सरकार

टेलिभिजनको मुख, रेडियोको धुन

ठूला कम्पाउन्डभित्रका भित्ताका रंगहरू

त्यही रंगमा सुहाउने गाडीको रंग र ब्रान्ड

चिल्ला गाडीका ड्राइभर र उसका युनिफर्म

अरू पनि थुप्रै कुरा फेरिएको छ

साहुको गेटमा सधैँ भुकिरहने कुकुरको आवाज

सेठानीकी नोकर्नी

सिमानाको आयतन

अदालतको कान र दिमाग

स्कूल र अस्पतालको बिलको अंक

फेरिएका छन् अरू पनि थुप्रै कुराहरू

तर, कहाँ फेरियो र युवाको सपना ?

खाडीको विकल्प ?

गाउँको गोरेटो ?

भत्केको पुल र मिचिएको सिमाना ?

जस्ताको तस्तै छ

सुन्तली मुसहरको काखी टालेको मैलो चोली

बिर्खे सार्कीको निधारको नाम्लो

कर्णालीवासीको कलेँटी परेको ओठ

तराइँका डुबेका बस्तीहरू

बिनाकारण जेल परेको छोराको रिहाइको मागमा

अदालतको ढोकामा

सधैँ देखिने निरिह पिताको आँशु

ओ नयाँ वर्ष !

सक्ने भए फेरिदे

सरकारको काम गर्ने ताल

न्याय र अदालतको चाल

भूकम्प पीडितको त्रिपाल

कोरोनाको काल

लोकतन्त्र र गणतन्त्रको बेहाल !