सदनमा फेरि उठ्यो सांसद विकास कोषको कुरा, अर्थमन्त्री भन्छन्- जनचाहना अनुसार हुन्छ

काठमाडौं । पूर्वअर्थमन्त्री विष्णु पौडेलले खारेज गरेको सांसद विकास कोष (सांसद पूर्वाधार साझेदारी कार्यक्रम) को निरन्तरताको लागि सदनमा आवाज उठेको छ ।

अर्थमन्त्री जनार्दन शर्माले श्वेतपत्र प्रस्तुत गरेपछि सुझाव दिने क्रममा नेपाली कांग्रेसका सांसद राजेन्द्रकुमार केसीले
सांसद पूर्वाधार साझेदारी कार्यक्रमे निरन्तरता पाउँछ कि पाउँदैन ? भनी प्रश्न गरेका छन् । अर्थमन्त्रीले श्वेतपत्रमा प्रतिस्थापन विधेयक प्रस्तुत गरी नयाँ वजेट ल्याउने प्रतिबद्धतालाई सकारात्मक भन्दै केसीले नयाँ बजेटमा सांसद पूर्वाधार साझेदारी कार्यक्रमलाई पनि समेट्न आग्रह गरे ।

‘माननीय अर्थमन्त्रीले प्रतिस्थापन विधेयक ल्याएर आर्थिक वर्ष २०७८/७९ को नयाँ बजेट ल्याउने बताउनुभएको छ । यसलाई सकारात्मकरूपमा लिन सकिन्छ । अब निर्माण हुने बजेटमा अत्यन्त लोकप्रिय कार्यक्रम सांसद पूर्वाधार साझेदारी कार्यक्रमले पनि निरन्तरता पाओस् भन्ने सुझाव राख्न चाहान्छु’, केसीले भने ।

जवाफको क्रममा अर्थमन्त्रीले आफूले कसैप्रति आग्रह/पूर्वाग्रह नराखि वर्तमान आर्थिक अवस्था यथार्थरूपमा प्रस्तुत गरेको दावी गरे । उनले कुनै पनि तथ्यांकसमेत आफूले नबंग्याएको बताए ।

सांसद पूर्वाधार साझेदारी कार्यक्रमको निरन्तरताको सन्दर्भमा अर्थमन्त्री शर्माले जनचाहनाबमोजिम हुने बताए ।