पौडेल पक्षको नयाँ सर्त- पहिले क्रियाशील सदस्यको टुंगो, त्यसपछिमात्र महाधिवेशनको मिति

काठमाडौं । नेपाली कांग्रेसको १४ औं महाधिवेशन भदौ २३ मा नहुने निश्चित भएपछि अर्को मितिका लागि विवाद सिर्जना भएको छ । नयाँ मिति तय गर्न आजै अपरान्ह केन्द्रीय कार्य समिति बैठक बस्दैछ ।

रामचन्द्र पौडेल पक्षका नेताहरूबीच भएको अनौपचारिक छलफलले क्रियाशील सदस्यता विवाद निरुपण भएपछिमात्र महाधिवेशनको नयाँ मिति तोक्नुपर्ने निष्कर्ष निकालेको छ । यसअघि देउवाले मंसिर र पौडेलले असोजमै महाधिवेशन गर्ने भनेका थिए ।

पौडेलको प्रस्तावमा देउवा पक्ष सहमत भए पनि शेखर कोइराला, गगन थापालगायतका नेताहरूको लाइनमा पौडेल पक्ष एकमत देखिएको छ । क्रियाशील सदस्यतामा भएको धाँधली र कार्यकर्ताको गुनासो सम्बोधन नगरी महाधिवेशनको मिति तोक्न नहुने कुरा आज बैठकमा उठ्ने भएको छ ।

पौडेल समूहका एक नेताले भने, ‘देशभरका कार्यकर्ताले उठाएको आवाजलाई निष्कर्षमा नपुर्‍याइ महाधिवेशनको मिति मात्र तोक्ने कुरा महत्वपूर्ण होइन । क्रियाशील सदस्यतामा भएको धाँधलीको पहिलो निरुपण गरौं भन्ने हो ।’