१६ वर्षपछि शिव र भुवनको टीमअप, फिल्म ‘डाँडाको वरपीपल’मा स्क्रिन सेयर गर्ने

काठमाडौं । निर्देशक शोभित बस्नेतको ३१ औं फिल्म ‘डाँडाको बरपीपल’मा अभिनेता भुवन केसी अनुबन्धित भएका छन् । निर्माण पक्षले भुवनलाई अनुबन्धित गर्दै फिल्म छायांकनको तालिका तय गरेको छ । कोरोनाको सेकेन्ड वेभमा लागू लकडाउनका कारण छायांकन अगाडि बढ्न सकेको थिएन ।

भदौ ५ गतेदेखि छायांकन सुरु हुने फिल्मको सुटिङ तालिका अवधि ६० दिनको हुनेछ । काठमाडौं र मकवानपुरको चित्लाङ आसपासका लोकेसनमा फिल्म खिचिने भएको छ ।

फिल्ममा यसअघि नै शिव श्रेष्ठ, गौरी मल्ल, सलोन बस्नेत, रुबिना थापा, विनोद न्यौपाने, राजीवजंग बस्नेत, अस्मिता जुरेली, अस्मि थापा, ज्ञानकुमार कटेल अनुबन्धित भइसकेका छन् ।

१६ वर्षपछि भुवन र शिवले सहकार्य गर्न लागेका हुन् । यी दुई अभिनेताले २०६२ सालको फिल्म ‘राजु राजा राम’मा सँगै अभिनय गरेका थिए । बुढासुब्बा ओर्जिनलको प्रस्तुतिमा निर्माण हुने फिल्ममा नवराज गिरीको लगानी रहनेछ ।

रामकाजी घिमिरेको लेखन रहने फिल्ममा सुशान्त प्रजापतिको छायांकन, शिव मुखिया÷एलिश कार्कीको संगीत, रोशन श्रेष्ठको द्वन्द्व, रामजी लामिछानेको कोरियोग्राफी, नवराज गिरीको गीत, राम्जी राउतको मुख्य सहायक निर्देशन र आकाश बुढाथोकीको सहायक निर्देशन रहनेछ ।