‘क्रियाशील सदस्यता फाराम कता छ ? वडा सभापति यता छ’ (तस्बिरहरू)

काठमाडौं । क्रियाशील सदस्यता वितरणमा धाँधली भएको भन्दै कांग्रेस कार्यकर्ताहरूले प्रधानमन्त्रीसमेत रहेका सभापति शेरबहादुर देउवाको निवास बूढानीलकण्ठअगाडि प्रदर्शन गरेका छन् ।

पटकपटक प्रमाणसहितको उजुरी दिँदा पनि आफूहरूको मागमा पार्टीले सुनुवाइ नगरेको उनीहरूको गुनासो छ । देउवा निवासमा भेला भएका रौतहट क्षेत्र नम्बर १ का नेता कार्यकर्ताहरूलाई सुरक्षाकर्मीले हटाएका छन् ।

विधान अनुसार वडा तहका सभापतिलाई क्रियाशील सदस्यता फाराम दिनुपर्ने भए पनि क्षेत्रीय सभापतिले वडा सभापतिलाई फाराम नदिएको उनीहरूको गुनासो छ । नेतृत्वको ध्यानाकर्षण गराउन पुगेकाले ‘क्रियाशील सदस्यता फाराम कता छ ? वडा सभापति यता छ’ जस्ता प्लेकार्डहरू बोकेका छन् ।

महाधिवेशनको संघारसम्म पनि सदस्यता नटुंग्याइएको, पार्टीको विधान, नियमावली र परिपत्रविपरीत बाँडिएका सदस्यता खारेज गरिनुपर्नेलगायतका माग राख्दै कांग्रेसको केन्द्रदेखि जिल्लासम्म दिनहुँजसो धर्ना, अनसन जारी छ ।

तस्बिरहरू : सरोज बैजु ।