नयाँ बजेट ल्याउन चुनौती दिँदै पौडेलले भने- संसदको समय किन बर्बाद गरेको ?

काठमाडौं । पुर्वअर्थमन्त्री विष्णु पौडेलले नयाँ बजेट ल्याएर देखाउन सरकारलाई चुनौती दिएका छन् । अर्थमन्त्री जनार्दन शर्माले पेस गरेको श्वेतपत्रमा टिप्पणी गर्दै पौडेलले यो सरकारलाई नयाँ बजेट ल्याउने छुट भएको बताएका छन् । नयाँ बजेट ल्याउने भए अघिल्लो सरकारको ल्याएको बजेट संसदमा प्रस्तुत गरेर सदनको समय किन बर्बाद पारेको भनी उनले प्रश्न गरेका छन् ।

‘प्रतिस्थापन बजेट ल्याउन लागिएको छ । यदि यो बजेट ल्याउनु नै पर्ने थियो भने यसको विषयमा प्रतिनिधिसभामा छलफल गरियो ? र समय बर्वाद गरियो ? बजेट अर्को ल्याउनु तर हामीले ल्याएको भन्दा राम्रो बजेट ल्याउनु होस् । हामीले पनि स्वागत गर्न पाउँ,’ उनले भने ।

केपी ओली नेतृत्वको सरकारले मुलुकका समस्याहरूमा केन्द्रित रहेर यथार्थपरक, व्यवहारिक र लोकप्रिय बजेट प्रस्तुत गरिएको र त्यसलाई आर्थिक जीवनका हेरक पक्षले समेटेको पौडेलको भनाइ छ ।

‘निजी क्षेत्र र तिनका छाता संगठन, आर्थिक जगत र उत्पादनका हेरक इकाइहरूले ऐतिहासिक बजेट भनेर स्वागत गरेका छन्’, पूर्वअर्थमन्त्री पौडेलले भने ।