कर्णालीमा चार प्रतिशतले पाए पूर्ण खोप

सुर्खेत । कर्णाली प्रदेश स्वास्थ्य निर्देशनालयले प्रदेशका ४ प्रतिशत नागरिकलाई कोरोनाविरुद्धको पूर्ण खोप लगाइएको तथ्यांक सार्वजनिक गरेको छ ।

प्रदेशका १० जिल्लामा गरी अहिलेसम्म ४५ हजार ३ सय ८६ जनालाई कोरोना खोपको पूर्ण मात्रा दिइएको निर्देशनालयले जनाएको छ ।
कर्णालीमा १८ बर्षभन्दा माथीका १० लाख ९४ हजारलाई खोप लगाउनुपर्ने छ । अन्य प्रदेशको तुलनामा कोरोना संक्रमित र जोखिम कम रहेकाले पनि खोप कार्यक्रमलाई तीव्रता दिएको देखिँदैन ।

निर्देशनालयका सुचना अधिकारी नोदनारायण चौधरीका अनुसार हालसम्म पूर्ण मात्राको खोप लगाउने ४ प्रतिशत र पहिलो मात्राको खोप लगाउने २५ प्रतिशत रहेको बताए । अहिलेसम्म २ लाख ७१ हजार ४ जनाले खोपको पहिलो मात्रा पाएका छन् ।

पाँच महिना अघि कोभिसिल्डको पहिलो मात्रामा खोप लगाएका ८० हजारले अस्ट्रेजेनेका खोप लगाउन विहीबारदेखि सुरु गरेको उनको भनाइ थियो ।
कर्णालीमा करीब १ लाख ८ हजार ४ सय ८६ जनाले कोभिसिल्डको पहिलो मात्रा लगाएकोमा तीमध्ये२५ हजार ८ सय १६ जनाले दोस्रो डोज पाएका छन्।

यस्तै कर्णालीमा २६ हजारले भेरोसेलको दुबै मात्रा खोप लगाइसकेका छन भने अहिले ९२ हजारभन्दा धेरैले पहिलो मात्राको भेरोसेल खोप लगाइरहेको उनको दाबी छ ।

जोन्सन एन्ड जोन्सनको खोप ३७ हजार भन्दा बढीले लगाएका छन्।