दुईसय लोकदोहोरी कलाकारले लगाए कोभिडविरुद्धको खोप

काठमाडौं । पछिल्लो समय कलाकारहरुलाई पनि कोभिड-१९ विरुद्धको खोप लगाउन थालिएको छ । गतसाता ३ हजार फिल्मकर्मीले खोप लगाए भने यो साता लोकदोहोरी कलाकारले खोप लगाएका छन् ।

राष्ट्रिय लोक तथा दोहोरी गीत प्रतिष्ठानको समन्वयमा उनीहरुले राजधानीका विभिन्न खोप केन्द्रमा खोप लगाएका हुन् । सोमबार नयाँ बानेश्वरस्थित निजामति अस्पतालमा दोहोरी कलाकारले खोप लगाए ।

देवी घर्ती, राजु ढकाल, खेम सेन्चुरी, पुस्कल शर्मा, रमेशराज भट्टराई र दीपक खड्का लगायतका कलाकारले खोप लगाएका छन् । प्रतिष्ठानका अध्यक्ष रमेश बीजीका अनुसार २ सयभन्दा बढी कलाकारले खोप लगाएका छन् । बाँकी कलाकारले आज खोप लगाएका छन् ।

कोरोना महामारीको कारण लोकदोहोरी क्षेत्र निकै प्रभावित बनेको छ । जारी निषेधाज्ञाको कारण पनि कलाकारले सानो संख्यामा र सामाजिक दूरी अपनाएर म्युजिक भिडिओ छायांकन खिचिरहेका छन् ।

लामो समयदेखि स्टेजका कार्यक्रम ठप्प हुँदा कलाकारलाई आर्थिकरुपमा जोहो गर्न मुस्किल भइरहेको छ । खोप लगाइसकेपछि काममा फर्कन सजिलो हुने कलाकारको भनाई छ ।