अमेरिकामा कोभिडबाट एकैदिन हजारको मृत्यु, न्यूजिल्यान्डमा डेल्टा संक्रमण पुष्टि

वासिङ्टन । अमेरिकामा कोभिड-१९ संक्रमणबाट मंगलबार एकैदिन एक हजार जनाको मृत्यु भएको छ । कम खोप लगाएका राज्यमा डेल्टा भेरिएन्ट संक्रमणसँगै मृत्युदर पनि बढेको रोयटर्सले जनाएको छ ।

गत महीनादेखि अमेरिकामा दैनिक औषत ७६९ जनाको मृत्यु भएको छ । यो संख्या गत अप्रिल मध्यदेखि यताकै उच्च हो । मृत्यु र संक्रमण दरमा वृद्धि भएसँगै राष्ट्रपति बाइडेनले यात्रुका लागि थप कडा कदमहरु घोषणा गर्ने तयारी गरेका छन् ।

अमेरिकालाई अहिले डेल्टा संक्रमण र यसको फैलावट मुख्य चुनौति बनिरहेको छ ।

यसैबीच, न्यूजिल्यान्डमा पनि डेल्टा भेरिएन्ट पुष्टि भएको छ । एकजनामा भाइरस संक्रमण पुष्टि भएपछि मंगलबारदेखि देशव्यापी लकडाउन गरिएको न्यूजिल्यान्डमा पहिलोपटक डेल्टा पुष्टि भएको हो ।

प्रधामन्त्री ज्याकिन्डा आर्डेनले छिमेकी मुलुक अष्ट्रेलियाबाट डेल्टा संक्रमण भएको हुनसक्ने बताएकी छिन् । बुधबार थप ६ वटा संक्रमण पुष्टि भएको न्यूजिल्यान्डका अधिकारीले जनाएका छन् ।