यस्तो हुनेछ चार प्रकारको स्मार्ट लकडाउन (कार्यविधिसहित)

काठमाडौं । कोभिड संकट व्यवस्थापन केन्द्र (सीसीएमसी)ले भदौ १ गतेदेखि देशभर स्मार्ट लकडाउनको कार्यविधि लागू गरेको छ । यसलार्ई लागू गर्न सीसीएमसीले मुलुकका ७७ वटै जिल्ला प्रशासन कार्यालयलाई सर्कुलर पनि जारी गरेको छ ।

सोही सर्कुलरको आधारमा अहिले जिल्ला प्रशासन कार्यालयहरु संक्रमण र स्वास्थ्य पूर्वाधारलाई हेरेर लकडाउन लागू गर्ने योजनामा छन् ।

संक्रमण, मृत्यु, अस्पतालको पूर्वाधार, जनस्वास्थ्य मापदण्ड कार्यान्वयनको अवस्थालाई हेरेर सीसीएमसीले मुलुकलाई चार रङमा विभाजन गरिने गाइडलाइन बनाएको छ । जसमा रेड, एम्बर, एल्लो र ग्रीन जोनमा विभाजन गर्ने कार्यविधिमा उल्लेख छ ।

संक्रमितको संख्या ६५ प्रतिशतभन्दा माथि भए रेड जोन, ३१ देखि ६५ प्रतिशत भए एम्बर, १६ देखि ३० प्रतिशतमा भए पहेंलो संकेतमा सफ्ट लकडाउन, १५ प्रतिशतभन्दा कम भए हरियो अर्थात मिनिमल लकडाउनको नियम ल्याइएको छ ।

सीसीएमसीको यही कार्यविधिको आधारमा काठमाडौं उपत्यकाका सीडीओहरु निषेधाज्ञाको नयाँ ढाँचा बनाउन जुटेका छन् । अहिलेको निषेधाज्ञा भदौ ८ गतेसम्म कायमै छ ।