बर्दियामा गेष्टहाउसबाट शताब्दी पुरानो बुद्धको मूर्तिसहित ५ जना पक्राउ

बर्दिया । गुलरिया नगरपालिका-७ स्थित बिजय गेष्ट हाउसबाट बुद्धको मूर्तिसहित ५ जना पक्राउ परेका छन्। विजय गेष्ट हाउसको कोठा नम्बर ३२८ बाट ७ किलो ७ सय २ ग्रामको मूर्तिसहित ५ जनालाई बुधबार दिउँसो प्रहरीले पक्राउ गरेको हो ।

पक्राउ पर्नेमा गुलरिया नगरपालिका-७ बस्ने ४० वर्षीय निराजन उप्रेती, ३४ वर्षीय उज्वल रोकाय, ३४ वर्षीय अमृत राई, ३२ वर्षीय ईश्वरीप्रसाद उपाध्याय र जाजरकोट बारेकोट गाउँपालिका-२ बस्ने २९ वर्षीय मगबहादुर नेपाली छन् ।

उक्त गेष्ट हाउसमा पुरातत्विक वस्तु (सयौं वर्ष पुरानो बहुमूल्य धातुको बुद्धको मूर्ति) करोडौं रुपैयाँमा किनबेच गरिरहेका भन्ने सूचनाको आधारमा प्रहरी परिचालन गरिएको र मूर्तिसहित उनीहरूलाई पक्राउ गरिएको बर्दिया प्रहरी प्रमुख एसपी ईश्वर कार्कीले जानकारी दिए ।

यस सम्बन्धमा थप अनुसन्धान भइरहेको जिल्ला प्रहरी कार्यालय बर्दियाले जनाएको छ ।