८ वर्षीया बालिका किनेर ‘सेक्स-स्लेभ’ बनाउनेलाई १८ वर्ष कैद

काठमाडौं । आठ वर्षीया बालिकालाई किनेर ‘सेक्स-स्लेभ’ बनाउने एक क्यानडियन नागरिकलाई १८ वर्षका लागि कैद सजाय सुनाइएको छ । अफ्रिकी मुलुक आइभरी कोस्टबाट ८ वर्षीया बालिकालाई किनेर क्यानडा लगेर उनले तीन वर्षसम्म ‘सेक्स-स्लेभ’ बनाएका थिए ।

क्यानडाको मोन्टेरल शहरमा बस्दै आएका ६० वर्षीय सिल्भेन भिलामेरलाई न्यायाधीश पिएर ल्याबेलले कैदको फैसला सुनाएका हुन् । भिलामेर पूर्व ‘साइकोएडुकेटर’ रहेको र खतरामा रहेका किशोर-किशोरीको मद्दत गर्ने गरेको भाइसले लेखेको छ ।

भिलामेर सन् २०१५ मा अफ्रिका गएका थिए । जहाँ ती बालिकाकी आमा निश्चित पैसा लिएर आफ्नी छोरीलाई ती व्यक्तिसँगै क्यानडा पठाउन तयार भएकी थिइन् । ती व्यक्तिले बालिकाको जीवन सुन्दर बनाइदिने र भविष्य उज्वल बनाइदिने आश्वासन दिएका थिए ।

तर, त्यसको बदलामा उनले ती बालिकालाई ‘सेक्स-स्लेभ’ बनाएर तीन वर्ष सम्म राखेको खुलेको थियो । समय-समयमा बालिकालाई अन्य मानिससँग पनि पठाएको र बाध्य बनाएर राखेका थिए ।

भिलामेरसँग ‘चाइल्ड पोर्नोग्राफी’सम्बन्धी ८ हजार तस्वीरहरू रहेकोसमेत फेला परेको थियो । प्रहरीले बाल यौन दुर्व्यवहार मुद्दामा भिलामेरमाथि अनुसन्धान गर्ने क्रममा तीन वर्षपछि ती बालिकालाई फेला पारी उद्धार गरेको थियो । तीनै भिलामेरमाथि बुधबार तीन अपराध- यौन शोषण, मानव तस्करी र बाल यौन दुर्व्यवहार मुद्दामा गरी १८ वर्ष कैदको फैसला सुनाइएको हो ।