तालिवानले सत्ता कब्जा गरेपछि अफगानिस्तान क्रिकेट बोर्डको नेतृत्व हेरफेर

एजेन्सी । अफगानिस्तान क्रिकेट बोर्ड (एसीबी)को अध्यक्षमा अजिजुल्लाह फाजली नियुक्त भएका छन् । पश्चिमा देशको सैनिक फिर्ता भएसँगै निर्वाचित सरकारलाई अपदस्त गरी तालिवानले सत्ता संहालेपछि पहिलोपल्ट क्रिकेट बोर्डमा नेतृत्व हेरफेर गरिएको हो ।

फाजलीले यसअघि एक कार्यकाल एसीबीको अध्यक्ष भइसकेका छन् । तत्कालीन अध्यक्ष अतिफ माशलले राजीनामा गरेपछि सन् २०१८ को सेप्टेम्बरमा उनी अध्यक्ष बनेका थिए ।

तर सन् २०१९ को एकदिवशीय विश्वकपमा अफगानिस्तान अन्तिममा रहेपछि उनलाई फरहान युसुफजाईले प्रतिस्थापन गरेका थिए ।

तालिवानले एसीबी अफिसियलहरुसँग छलफलपछि फजलीलाई अध्यक्षमा नियुक्त गरिएाको हो । फाजली दुई दशकदेखि अफगानी क्रिकेटसँग जोडिएका छन् । उनी देशमा क्रिकेट खेल स्थापना गर्ने समयमा खेलाडीको सुरुआती समूहमा सहभागी थिए ।

उनलाई यसअघि एसीबीको उपाध्यक्ष र सल्लाहकारका रुपमा पनि जिम्मेबारी दिइएको थियो । उनी घरेलु क्रिकेटको क्षेत्रीय संरचना तयार गर्ने टिममा पनि सहभागी थिए ।

फाजलीले पाकिस्तानविरुद्ध श्रीलंकामा हुन लागेको आसन्न एकदिवशीय शृंखलाका समस्याहरुलाई तत्कालै समाधान गर्नुपर्नेछ ।

तालिवानले सत्ता कब्जा गरेपछि काबुल अन्तर्राष्ट्रिय विमानस्थलबाट अहिलेसम्म व्यवसायिक उडान सुरु भएको छैन । यस्तो अवस्थामा राष्ट्रिय टोलीलाई स्थल मार्गबाट पाकिस्तान हुँदै श्रीलंकाको उडान भर्नुपर्ने हुन्छ ।

श्रीलंकामा पछिल्लो समय कोरोना भाइरस संक्रमणको दर उच्च हुन थालेपछि १० दिनको लकडाउन घोषणा भएको छ । यसले पनि अफगानिस्तान र पाकिस्तानबीचको शृंखला प्रभावित हुन सक्छ ।