एमालेको बहिष्कारका बीच मुख्यमन्त्री केसीले मागे विश्वासको मत

रुपन्देही । लुम्बिनी प्रदेशसभाको जारी बैठक प्रमुख प्रतिपक्षी दल नेकपा एमालेले बहिष्कार गरेको छ । एमालेको बहिष्कारकै बीच मुख्यमन्त्री कुलप्रसाद केसीले विश्वासको मत लिने तयारी गरेका छन् ।

एमाले प्रदेश संसदीय दलका उपनेता वैजनाथ चाैधरीले बैठक औचित्यहीन भएकोले पार्टीले बहिष्कार गरेको बताए ।

चौथो बैठक तय भएको आधा घण्टापछि भर्खर शुरू भएको छ । केसीले सदनसमक्ष विश्वासको मत दिन माग गरेका छन् ।

अजय शाही र विमला वलीलाई पदमुक्त नगरेको विरोधमा लगातार सदन अवरोध गरिरहे पनि सभामुखले तीनपटक स्थगित गर्दै चौथोपटक बैठक आव्हान गरेका हुन् ।

लुम्बिनी सभामा नेपाली कांग्रेसका १९, माओवादीका १९, जसपाका ३, जनमोर्चाका १ सांसद छन् । एमाले ३८ जना छन् । सूर्य चुनाव चिन्हबाट चुनाव जितेका अजय शाहीलाई भने प्रदेशसभाले स्वतन्त्र सांसद दावी गरेको छ ।