प्रिमियर लिगले कोरोनाको उच्च जोखिम देशका खेलाडीलाई छुट्टी नदिने

एजेन्सी । अन्य युरोपियन क्लबहरुले जस्तै प्रिमियर लिगले पनि कोरोनाको उच्च जोखिममा रहेको देशका खेलाडीलाई अन्तर्राष्ट्रिय टिमका लागि पठाउन अस्वीकार गरेको छ ।

सेप्टेम्बरमा सबै महादेशमा विश्वकप छनोटका खेलहरु आयोजना हुँदैछन्, प्रमुख खेलाडीको अनुपस्थिति ती देशका लागि महंगो पर्नसक्छ ।

क्वारेन्टीन अवधिमा पुनर्विचार नगर्ने हो भने अन्य देशका खेलाडीहरु राष्ट्रिय टोलीबाट खेलेर बेलायत फकँदा १० दिनको अजिवार्य क्वारेन्टाइनमा रहनुपर्छ । जसकारण घरेलु लिगका खेल उनीहरुले गुमाउनेछन् ।

फुटबल एशोसियसन र प्रिमियर लिगले क्वारेन्टाइन नियम परिवर्तन गर्नका लागि बेलायतको डिजिटल, संस्कृति, मिडिया र खेल विभागका अधिकारीहरुसँग छलफल गरिरहेका छन् । समाचारमा जनाइएअनुसार यो समस्या पूरै युरोपका क्लबहरुले सामना गर्नुपर्नेछ ।

लिभरपुल ती क्लबहरुमध्येको एक हो, जसले अन्तर्राष्ट्रिय खेलका लागि खेलाडीहरुलाई छुट्टी दिन अस्वीकार गरेको छ । यो नियमले लिभरपुलका चार खेलाडी प्रत्यक्ष प्रभावित हुनेछन् । इजिप्टका मोहम्मद सलाह र ब्राजिलका एलिसन, फाविन्हो र रोवर्टो फिर्मिनो । किनभने इजिप्ट र ब्राजिललाई बेलायतले अहिलेसम्म कोरोनाको उच्च जोखिम क्षेत्र अर्थात रेड लिष्टमा राखेको छ ।

इजिप्ट फुटबल एशोसियसनले आफ्नो वेवसाइटमा उल्लेख गरेअनुसार सलाहलाई नबोलाउन लिभरपुलले संघलाई आग्रह गरेको छ र त्यसका लागि माफी पनि मागेको छ ।

तर लिभरपुलले इजिप्ट र गावोनबीचको खेलका लागि भने सलाह उपस्थित हुनसक्ने जनाएको छ । किनभने त्यो देश बेलायतको रेड लिष्टमा छैन ।