मन्त्रीले जहाज अपहरण गरेको दावीपछि अक्षयकुमारको ‘बेलबटम’लाई साउदी, कुवेत र कतारद्वारा प्रतिबन्धको घोषणा

काठमाडौं । अक्षयकुमार अभिनित पछिल्लो फिल्म ‘बेलबटम’ केही मुलुकमा विवादमा तानिएको छ । मध्यपूर्वका तीन मुलुक साउदी अरब, कुवेत र कतारले फिल्मको प्रदर्शनमा प्रतिबन्ध लगाएका छन् । फिल्ममा चित्रण गरिएका कतिपय तथ्यहरु सत्य नभएको भन्दै प्रदर्शन रोकिएको हो ।

सन् १९८० को दशकमा भएको विमान अपहरणको घटनामा आधारित रहेर बनाइएको यो स्पाइ–थ्रीलरको मुख्य भूमिकामा अक्षय स्वयम चित्रित छन् । फिल्मको दोस्रो भागमा अक्षयले विमान अपहरणमा परेका २१० जनालाई उद्दार गरेका छन् ।

सन् १९८४ मा भएको विमान अपहरणको घटनामा यूएईको मन्त्री शेख मोहम्मद बिनरसिद पनि सहभागि रहेको दावी फिल्मले गरेको छ । जसको कारण साउदी, कतार र कुवेतले प्रतिबन्ध लगाएका हुन् । उक्त दावी गलत भएको उनीहरुले बताएका छन् । कोरोना महामारीको बीचमै प्रदर्शनमा आएको फिल्मलाई रंजीत एम तिवारीले निर्देशन गरेका हुन् ।

सोचेअनुसार कमाइ गर्न सकेन

कोरोना महामारीले गर्दा अक्षय कुमारको फिल्म ‘बेल बटम’ले सोचेजस्तो बक्स अफिस कलेक्सन गर्न सकेको छैन । यो फिल्म पाँचदिन अघि ओटीटी र फिल्म हलहरुमा विश्वव्यापी प्रदर्शन भएको थियो । यो फिल्मले पाँच दिनसम्म भारतमा १४.४० करोड ग्रस कमाएको छ जुन निकै न्यून हो ।

रक्षाबन्धनको अवसरमा फिल्मले सबैभन्दा धेरै कलेक्सन गरेको छ । बिहीबार रिलिज भएको फिल्म हलमा दर्शकहरु ५० प्रतिशत पनि उपस्थित नभएको एक रिपोर्टले जनाएको छ । पहिलो दिन फिल्मले २.७५ करोड भारु कमाएको थियो भने दोस्रो दिन २.५० करोड कलेक्सन गरेको छ । त्यस्तै शनिबार फिल्मले ३ करोड भारु कलेक्सन गरेको छ ।