कोरोना फैलिन थालेपछि जापानका थप ८ प्रान्तमा आपतकाल, संवेदनशील क्षेत्र पनि थपिँदै

टोकियो । कोरोना भाइरसको नयाँ संस्करण डेल्टाको संक्रमण द्रूत गतिमा फैलन थालेको भन्दै जापान थप ८ प्रान्त (प्रिफेक्चर) आपतकाल घोषणा गर्ने क्रम अन्तिम चरणमा पुगेको छ ।

टोकियो, ओसाका लगायतका १३ क्षेत्रमा यसअघिनै आपतकाल घोषणा गरेको जापानले होक्काइडो, मियागी, गिफु, आइची, मीए, शिगा, ओकायामा र हिरोशिमा गरी थप ८ प्रान्तमा आपतकाल घोषणा गर्न लागेको हो ।

त्यसैगरी कोची, सागा, नागासाकी र मियाजाकी प्रात्तलाई संवेदनशील क्षेत्र घोषणा गरी संक्रमण फैलावट नियन्त्रणका लागि महत्वपूर्ण उपायहरु अवलम्वन गर्नुपर्ने सूचीमा राख्ने जापान सरकारले तयारी गरेको छ ।

‘संक्रमितहरुको संख्या दिनप्रतिदिन बढ्दो क्रममा छ,’ क्याबिनेट मन्त्री निशिमुराले भने, ‘प्रतिदिन २५ हजारको हाराहारीमा सक्रमितहरु बढिरहेका छन् ।’ उनका अनुसार अगष्ट २७ देखि अर्को महिनाको १२ तारिखसम्म थप ८ क्षेत्रमा आपतकाल घोषणा गरिनेछ।

सोही दिन देखि लागु हुने गरि कोची, सागा, नागासाकी र मियाजाकी अंचललाइ संबेदनशील क्षेत्रको सूचीमा राखी सक्रमण नियन्त्रणका महत्वपूर्ण उपाएहरु अपनाइने निशिमुराले बताएका छन् ।

गर्मी बिदा सकिएपछि अनलाइन बाट पठन पाठन संचालन गर्न स्थानिय सरकारहरुलाई आग्रह गर्ने केन्द्रीय सरकारको तयारी छ । प्राथमिक र माध्यमिक बिद्यालयहरुलाई एन्टिजेन टेस्ट किट वितरण गर्ने बिषयमा पनि अहिले छलफल चलिरहेको ति मन्त्रीले जानकारी दिएका छन् ।

२० देखि ५० वर्ष उमेर समुहका मानिसहरु बढी सक्रमित भएको भन्दै सकेसम्म कार्यालयका कामहरु अनलाइन गर्ने, घर बाहिर निस्कने मानिसहरुको संख्या आधा घटाउने, दैनिक उपभोग्य सामानहरु दिनमा १ पटक मात्र गर्ने गरि विज्ञहरु संग छलफल भैरहेको संचार माध्यमहरुले उल्लेख गरेका छन् ।

विज्ञहरुले अघिल्लो बर्षको भन्दा यो बर्षको अबस्था थप जटिल रहेको भन्दै सक्रमण नियन्त्रणका लागि सम्भव भए सम्मका उपाएहरु अबलम्बन गर्न सरकारलाई आग्रह गरेका छन् ।