युवा संघको छोटो फिल्म कम्पिटिसनमा छानिए १०८ स्क्रिप्ट

काठमाडौँ । राष्ट्रिय युवा संघ नेपालले आयोजना गर्न लागेको ‘म केही गर्छु’ शीर्षकको छोटो फिल्म प्रतिस्पर्धामा १०८ वटा स्क्रिप्टबीच प्रतिस्पर्धा हुने भएको छ । उक्त थिममा रहेर मुलुकभरबाट प्राप्त ११५ वटा स्क्रिप्टमध्येबाट १०८ वटा छानिएको हो । छानिएका स्क्रिप्टमाथि फिल्म बनाउनेबारे आयोजित अभिमुखीकरण कार्यक्रम पनि सकिएको छ ।

स्क्रिप्ट लेखक र फिल्म निर्माणबारे विज्ञहरुलाई बोलाएर चलचित्र विकास बोर्डमा ओरिएन्टेसन कार्यक्रम गरिएको थियो । कार्यक्रममा निर्देशक मीन भाम, छायांकार बिष्णु कल्पित, फिल्म कलेजका प्रिन्सिपल शिशिर उप्रेती, फिल्मकर्मी अर्जुन देव जोशीले सहभागीहरुलाई निर्माणबारे जानकारी गराए । सहजीकरण चलचित्र पत्रकार संघका महासचिव समिर बलामीले गरेका थिए।

निषेधाज्ञाले घरमै बसिरहेका यूवाहरुको समय सदुपयोगका लागि प्रतिस्पर्धा आयोजना गरिएको राष्ट्रिय यूवा संघ नेपाल उपाध्यक्ष क्षितिज थेवेले बताए । सहभागी स्क्रिप्टलाई निर्णायक समितिले मापदण्ड अनुसार छनौट गरेको हो। छानिएका स्क्रिप्टले उद्यमशीलता र रोजगार, पर्यटन, कृषी तथा उद्योग, राजनीति र सुशासन, शिक्षा, स्वास्थ्य, खेलकुद, लैंगिक समानता र विविधता, कला संस्कृति र मनोरञ्जनलगायतका बिषयमा बढीमा ५ मिनेटसम्मको छोटा फिल्म बनाउनुपर्नेछ ।

छानिएका स्क्रिप्टहरुबाट छोटो फिल्म निर्माण गरि युवा संघलाई बुझाउनुपर्ने भएको छ । फिल्म बुझाईसकेपछि निर्णायक समितिले उत्कृष्ट तीन फिल्म छान्नेछ । छानिएका मध्ये पहिलो हुनेलाई २ लाख ५० हजार, दोस्रो हुनेलाई १ लाख ५० हजार र तेस्रो हुनेलाई १ लाख रुपैयाँ पुरस्कार प्रदान गरिने आयोजकले बताएको छ ।

उत्कृष्ट तीनसहित पाँच फिल्मलाई एक समारोह बीच विशेष प्रदर्शनी गरिने आयोजक पक्षले जनाएको छ । त्यस लगतै विजेताहरुलाई भव्य समारोह बीच पुरस्कार प्रदान गरिने बताइएको छ ।