कांग्रेसका जिल्ला सभापतिहरुको धर्नामा रामचन्द्रदेखि शशांकसहितका नेताको समर्थन (तस्बिरहरु)

काठमाडौं । नेपाली कांग्रेसको संस्थापन इतर समूहका नेताहरु जिल्ला सभापतिहरुको आन्दोलनमा ऐक्यवद्धता जनाउन पार्टी कार्यालय सानेपा पुगेका छन् ।

क्रियाशील सदस्यता सूची सार्वजनिक लगायतका माग राखेर जिल्ला सभापतिहरु रिले अनसनमा ऐक्यवद्धता जनाउन संस्थापन इतर समूहका नेताहरु सानेपा पुगेका हुन् ।

वरिष्ठ नेता रामचन्द्र पौडेल, पूर्वमहामन्त्री प्रकाशमान सिंह, महामन्त्री शशांक कोइराला,नेताहरु अर्जुननरसिंह केसी, बलबहादुर केसी, डा।शेखर कोइराला, दिलेन्द्रप्रसाद बडु, चित्रलेखा यादव लगायत सानेपा पुगेर अनसनमा समर्थन जनाएका छन् ।

पूर्वमहामन्त्री प्रकाशमान सिंहको चाक्सीबारीस्थित निवासमा सम्पन्न बैठकले जिल्ला सभापतिहरुले राखेका मागहरु सम्बोधन गर्न सबै नेताहरु पार्टी कार्यालय सानेपामै पुगेर आन्दोलनमा ऐक्यवद्धता जनाउने निर्णय गरिएको थियो ।

आफ्ना माग पूरा गराउने विषयमा पार्टी नेतृत्वले चासो नदेखाएको भन्दै ३ जिल्लाका सभापति र २ युवा नेता आज अनसनमा बसेका छन् ।

नेपाली कांग्रेस नुवाकोटका सभापति जगदीश्वर नरसिंह केसी, काभ्रे जिल्ला सभापति मधु आचार्य, धादिङ जिल्ला सभापति रमेश धमला तथा युवा नेताद्वय रञ्जित कर्ण र डिल्लीराम सुवेदी अनसनमा बसेका हुन् ।

पूर्व सभासद कर्ण र नेविसंघ पूर्व उपाध्यक्ष सुवेदी सबल कांग्रेसका लागि युवा अभियानमा आवद्ध छन् । रिले अनसन २४ घण्टे हुने जनाइएको छ । माग पूरा गर्न उदासीन भए आमरण अनसनसम्म सुरु गर्ने चेतावनी जिल्ला सभापतिहरुले दिएका छन् ।

संस्थापन इतर समूहका जिल्ला सभापतिहरुले यसअघि मंगलबार कांग्रेस केन्द्रीय कार्यालय सानेपामा धर्ना दिएका थिए ।