विल्शेर भन्छन्- कुनै क्लबले मलाई चाहँदैनन भनेर छोरालाई कसरी भन्ने ?

एजेन्सी। आर्सनलका पूर्व स्टार मिडफिल्डर ज्याक विल्शरले नयाँ क्लब खोज्न आफूले संघर्ष गर्नुपरेको बताएका छन् । कुनै पनि टोलीले उनलाई अनुबन्ध गर्न नचाहेको र आफू घाटामा रहेको कुरा स्वीकारेका हुन् । आर्सनल छाड्नुअघि वेस्ट ह्याम र बर्नमाउथबाट खेलेका विल्शेर आफ्नो खेल जीवनमा दीर्घकालीन योजनाहरू बनाउन असफल भएका छन् ।

इङ्ल्यान्डबाट २९ वर्षको उमेरमा ३४ खेल खेलिसकेका विल्शेरलाई कुनै पनि टोलीले भित्र्याउन नचाहनु आश्चर्यजनक हो । उनी अहिले फिट रहनका लागि एक्लै प्रशिक्षण गरिरहेका विल्शरले भने, ‘करिअरको यो क्षणमा यहाँ हुनेछु भनेर कल्पना गर्न पनि गाह्रो छ, र यो सोच्दै एउटा एथ्लेटिक्स ट्रयाकमा दौडिरहेको छु ।’

‘मेरा छोराछोरी बुझ्ने भइसकेका छन् । विशेष गरी ९ वर्षीय आर्चीले किन एमएलएसमा खेल्नुहुन्न ? ला लिगामा किन नखेल्नु भएको ? भनेर सोध्छन्,’ विल्शेरले एथल्टिकसँग भनेका छन् ।

‘उसलाई बुझाउन धेरै गाह्रो छ,’ विल्शरले भने, ‘उसले मलाई तपाईंलाई किन कुनै क्लबले चाहँदैनन् ? भनेर साेध्छ । यो सबै कुरा उसलाई कसरी स्पस्ट पार्ने, कसरी बुझाउने ? मलाई केहि थाहा छैन ।’

‘जब म बाहिर निस्कन्छु मान्छेहरूले मलाई चिन्छन् र किन तिमीले इङ्ल्यान्डको क्लबमा साइन नगरेको भनेर सोध्छन् । उनीहरूले गरेको प्रश्‍नको जवाफ दिने प्रयास गर्नु मेरोलागि सबैभन्दा गाह्रो पक्ष हुन्छ,’ उनी भन्छन् ।

इङ्ल्यान्ड छाड्ने समय आएको हो ?

सम्पूर्ण करिअर आफ्नै देश- इङ्ल्यान्डमा बिताएका विल्शेरको अर्को व्यावसायिक गन्तव्य कहाँ हुने भन्ने तय गर्न सकेका छैनन् ।

‘मैले पहिले नै भनेको छु, अन्य देशमा खेल्नका लागि तयार छु । सायद वास्तवमै म विदेश जान चाहन्छु । म केहि फरक प्रयास गर्न चाहन्छु,’ उनले भने, ‘कतै गएर नयाँ सुरुवात गर्न चाहन्छु जहाँ मानिसहरू,क्लब र समर्थकहरूले यो नसोचुन्- यो ज्याक विल्शेर हो, आज घाइते हुन्छ वा उसले पाँच खेल खेल्छ । यो लगानीको बर्बादी मात्रै हो…’

‘मलाई लाग्छ यो देशको ढोका मेरोलागि बन्द गरिएको छ । तर, थाहा छैन किन ?,’ उनी भन्छन्, ‘सायद मेरो चोटले भरिएको इतिहास त्यसको कारण हो… या ठाउँ-ठाउँका मानिसहरूबाट त्यस्तो सुझाव पाएर हो । मलाई यो सबै अन्याय भएझैँ लाग्छ ।’

‘अन्तिम पटक म २०२० मा घाइते भएको थिएँ,’ विल्शेर भन्छन्, ‘सबैले ओहो उसको खुट्टा ,उसको खुट्टा तर त्यो मेरो खुट्टा थिएन त्यो हर्निया थियो, एक ठूलो चोट थियो । त्यो १० दिनको प्रतियोगिता थियो । दुभाग्यवश लकडाउन भयो । तर, म ठीक भएँ । आफैलाई शारिरीक रूपमा फिट राखेँ ।’

‘मेरो अर्को स्टेप पैसा कमाउनु हुनेछैन । मेरो मनमा जे भरिएको त्यो महत्त्वपूर्ण छ । म बच्चा बेलाको मात्रै कुरा गरिरहेको छैन, आर्सनलका सुरुआती दिनमा म फुटबल खेल्न मन पराउँथेँ । इमिरेट्समा खेल्थेँ,’ उनी भन्छन्, ‘म त्यही कुरा फेरि महसुस गर्न चाहन्छु ।’