जापानमा मोडेर्ना खोप लगाउन रोक, तोकिएभन्दा फरक तत्व मिसिएको दाबी

टोकियो । जापानको केन्द्रीय सरकारले कोरोना भाइरसविरुद्दको मोडेर्ना खोपमा तोकिएको भन्दा फरक तत्वको मिसावट भएको भन्दै खोप प्रयोग नगर्न निर्देशन दिएको छ ।

जापानको श्रम तथा स्वास्थ्य मन्त्रालयले उक्त खोपमा तोकिए भन्दा बढी बाध्य तत्वको मिसावट भएको भन्दै उक्त खोपको प्रयोग नगर्न स्थानीय सरकारलाई निर्देशन दिएको हो ।

मोडेर्ना खोपको जापान वितरक ताकेदा फार्मेसिटिकल कम्पनीका अनुसार उक्त ५ वटा प्रान्तको विभिन्न ठाउँमा वितरण भएको १६ लाख ३० हजार डोज खोप तत्काललाई नलगाउन निर्देशन दिइएको छ ।

जापानको आईची, गिफु,टोकियो, इबाराकी र साइतामा प्रान्तहरुमा वितरण भइरहेका खोपहरुमा त्यस्ता बाह्य पदार्थ मिसिएको जानकारी स्वास्थ्य मन्त्रालयले बिहीवार बिहान जानकारी गराएको थियो ।

स्वास्थ्य मन्त्रालयका अनुसार, एउटै लटमा एउटै कम्पनी (स्पेन)मा उत्पादन गरिएको उत्पादन गरिएका १६ लाख ३० हजार डोज खोप ३ वटा लट नम्बर सहित जापान आइपुगेको थियो । ३००४६६७, ३००४७३४ र ३००४९५६ लट नम्बरका खोपहरुमा त्यस्ता बाह्य पदार्थ मिश्रण भएको बताइएको छ ।

सबै खोपहरुमा मिसावट हो या केहि बोत्तलमा मात्र हो भन्नेबारी अनुसन्धान भइरहेको जनाइको छ । हालसम्म यो खोप लगाएका व्यक्तिहरुले स्वास्थ्य खरावी आएको घटना भने सार्वजनिक भएको छैन ।