उपेन्द्र यादव भन्छन्– साधु महन्थहरु ओलीको मतियार बनेपछि जसपाको सरकार बनेन

जनकपुरधाम । जनता समाजवादी पार्टी (जसपा)का अध्यक्ष उपेन्द्र यादवले महन्थ ठाकुरहरुकै गल्तीका कारण पार्टीको नेतृत्वमा सरकार बन्ने अवसर गुमेको बताएका छन् ।

‘केपी ओलीको कर्तुत असंवैधानिक हो भन्दै पार्टीले सर्वसम्मत रुपमा आन्दोलन गर्ने र आफ्नो पार्टीको नेतृत्वमा सरकार बनाउने निर्णय गरेका थियौं’, जनकपुरमा आयोजित अभिमुखीकरण कार्यक्रममा महन्थ ठाकुरलाई लक्षित गर्दै अध्यक्ष यादवले भने, ‘तर साधु महन्थहरु केपी ओलीको मतियार बनेकै कारण जसपाको नेतृत्वमा सरकार बन्न सकेन ।’

अध्यक्ष यादवले ‘आन्दोलनमा संगसंगै रहेका साधु महन्थहरु कति बेला भागेर बालुवाटार पुग्यो थाहासमेत नपाएको’ भन्दै व्यङ्ग्य गरे । उनले भने, ‘हामीसँगै आन्दोलनमा अगाडि बढ्दै थियो । कति बेला भागेर बालुवाटार पुग्यो, थाहा पनि भएन । त्यो दिनदेखि अहिलेसम्म फर्केका छैनन् ।’

महन्थ ठाकुर पक्षका सांसदहरुलाई लक्षित गर्दै उनले ‘माननीय समेत जोगाउन नसक्नेले मधेस र मधेसी जनता कसरी जोगाउन सक्छन् ?’ भन्दै प्रश्न समेत गरे ।

अध्यक्ष यादवले पार्टीबाट चिप्लिएर केही व्यक्ति मात्र गएको र उनीहरुले एउटा ग्रुप बनाएको टिप्पणी गरे । तत्कालीन राजपाका ८० प्रतिशत नेता र जनता आफ्नो पार्टीमा रहेको उनको दावी छ ।