ओली सरकारले बनाएको देशकै ठूलो सम्मेलन केन्द्रमा एमाले विधान महाधिवेशन हुने

काठमाडौं । नेकपा (एमाले) ले विधान महाधिवेशन देशकै ठूलो सम्मेलन केन्द्र गोदावरीमा गर्ने भएको छ । विधान माहाधिवेशनमा व्यवस्थापनको जिम्मेवारी पाएका रामबहादुर थापाले मंगलबार लतिपुरको गोदावरी पुगेर उक्त सम्मेलन केन्द्रको निरीक्षण गरेका छन्।

तीन हजार दर्शक अट्ने क्षमता भएको यो देशकै ठूलो सभाहल समेत हो । केपी ओली सरकारले यसलाई ‘ड्रिम प्रोजेक्ट’का रूपमा अघि बढाएको थियो । विशेष गरी यो हल परराष्ट्र मन्त्रालयले आयोजना गर्ने सगरमाथा संवादका बनाइएकाले चाँडो बनाउन ओलीले ताकेता समेत गरेका थिए । तर, कोभिड महामारीका कारण सगरमाथा संवाद हाललाई स्थगित छ ।

ओली सरकारका पालमा शुरू भएको सम्मेलन केन्द्रको ओलीले नै उद्घाटन गरेका थिए । असोज ४, ५ र ६ गते एमाले विधान महाधिवेशन हुँदैछ । सम्मेलनमा करिब तीन हजार प्रतिनिधि उपस्थित हुने छन् । यसका लागि हल उपयुक्त हुने एमाले नेताहरूले बताएका छन् ।