कर्णालीका ३ सांसद नेकपा एसमा, ७ सांसद घट्दा पनि एमाले नै ठूलो दल

सुर्खेत । कर्णाली प्रदेशसभाका ३ जना सांसदले नेकपा एमाले परित्याग गरेर नेकपा एकीकृत समाजवादी रोजेका छन् । मुगुका चन्द्रबहादुर शाही, जुम्लाका पदम रोकाय र रुकुमकी देवी ओलीले सुर्खेतस्थित निर्वाचन आयोगको कार्यालयमा पुगेर नेकपा एसको पक्षमा सनाखत गराउँदैछन् ।

आफूहरू तीनजनाले नेकपा एसको पक्षमा सनाखत गर्न लागेको सांसद देवी ओलीले नेपाल प्रेसलाई बताइन् । कर्णाली प्रदेशसभामा एमालेका २० सांसद थिए ।

प्रकाश ज्वाला, कुर्मराज शाही, अम्मरबहादुर थापा र नन्दसिंह बुढाले यसअघि नै फ्लोर क्रस गरेर माओवादी सरकारमा गएकाले उनीहरूको पद रिक्त भएको छ । सभामुखसहित १६ सांसदमध्ये ३ जनाले नेकपा एस रोजेपछि अब एमालेका सभामुखसहित १३ सांसद भएका छन् ।

४० सांसद रहेको कर्णाली प्रदेशसभा अब एमालेका १३, माओवादी केन्द्रका १२, कांग्रेसका ६, नेकपा एसका ३ र राप्रपाका एक सांसद रहेका छन् ।

माओवादीबाट एमाले रोजेका धर्मराज रेग्मीको पद यसअघि नै रिक्त भइसकेको छ ।