जापानमा सत्तापक्ष र प्रतिपक्ष विवाद- संसद अधिवेशन नबोलाएर संविधान उल्लंघन गरेको विपक्षीको आरोप

टोकियो । संसदको विशेष अधिवेशन बोलाउनु पर्ने बिपक्षीहरुको मागलाई सत्तापक्षले अस्वीकार गरेपछि जापानमा राजनीतिक सरगर्मी चुलिएको छ ।

संवैधानिक लोकतान्त्रिक पार्टी, कम्युनिस्ट पार्टी, लोकतान्त्रिक पार्टी र सामाजिक लोकतान्त्रिक पार्टी गरी ४ बिपक्षी दलले लिबरल डेमोक्रेटिक पार्टी नेतृत्वको सरकारलाई संसदको विशेष अधिवेशन बोलाउन आग्रह गरेका थिए ।

कोरोना सक्रमण बढ्दो क्रममा रहेकाले सक्रमण नियन्त्रणका लागि अहिले अवलम्बन गरिएका उपायहरु र पूरक बजेटसहितका बिषयमा छलफल गर्न संसदको विशेष अधिवेसन बोलाउनपर्ने बिपक्षी दलहरुको माग छ ।

तर, सत्तापक्ष भने पुरक बजेट आवश्यक नभएको भन्दै संसदको अधिवेशन बोलाउन नपर्ने अडानमा छ । संसदको विशेष अधिवेशन बोलाउन आफूहरुले गरेको आग्रहलाई अस्वीकार गर्नुलाई बिपक्षी दलहरुले ‘संविधानको उल्लंघन’ भनेका छन् ।

सरकारले जटिल परिस्थिमा पनि संसदका अधिकारलाइ नियन्त्रण गर्न खोजेको भन्दै असन्तुष्ट बनेका विपक्षी दलहरुले संक्रमण नियन्त्रणका लागि संसदीय समितिका अध्यक्ष मोरियामासमक्ष अधिवेशन बोलाउन माग गर्दै निवेदन पेश गरेका छन् ।

विपक्षी दलहरुले संसदको विशेष अधिवेशन बोलाउन माग गरेपछि संक्रमण नियन्त्रणका लागि संसदीय समितिका अध्यक्ष मोरियामाले सत्तारुढ दल र सरकारसँग छलफल गर्ने बताएका छन् ।

संविधानको धारा ५३ मा कुनै एक(तल्लो र उपल्लो सदन) सदनमा तत्काल कायम रहेका सदस्य संख्या मध्ये एक चौथाई सदस्यले संसदको विशेष अधिवेशनको माग गरेमा मन्त्रिपरिषदले अनिवार्य बोलाउनुपर्ने व्यवस्था छ ।