प्रदेश २ मा लोसपा रोज्ने सांसद १२ पुगे, थप दुईको सनाखत

जनकपुरधाम । जसपाका साँसदद्वय डिम्पल झा र प्रल्हाद गिरी ‘गोस्वामी’ ले लोकतान्त्रिक समाजवादी पार्टी (लोसपा) रोजेका छन् ।

महन्थ ठाकुरनिकट सांसद जितेन्द्र सोनलले दुवै सांसदलाई जनकपुरस्थित प्रदेश निर्वाचन कार्यालय लगेर सनाखत गराएका हुन् । गिरी तत्कालीन संघीय समाजवादी फोरमबाट निर्वाचित सांसद हुन् भने झा तत्कालीन राजपाको समानुपातिकतर्फका सांसद हुन् ।

साँसद झा लोसपा नेता अनिल झाका श्रीमती हुन् । महन्थ ठाकुर पक्षमा रहेको भन्दै मुख्यमन्त्री राउतले भौतिक पूर्वाधार विकास राज्यमन्त्रीबाट उनलाई बर्खास्त गरेको थियो ।

उपेन्द्र यादवको तत्कालीन संघीय समाजवादी फोरमबाट यस प्रदेशमा २९ जना निर्वाचित भएका थिए । राजपाका २५ सांसद थिए ।

यसअघि हिजो जसपाका १० सांसदले लोसपाको पक्षमा सनाखत गराएका थिए । आज झा र गिरीको सनाखतपछि लोसपामा १२ सांसद पुगेका छन् । सोनल, उपेन्द्र महतो, अभिराम शर्मालगायतले सनाखत गर्न बाँकी छ ।