विरोध र मुनुलाई मकवानपुरमा २५ जनप्रतिनिधिको साथ, एक प्रमुख र दुई उपप्रमुख नेकपा एसमा

हेटौंडा । निर्वाचन आयोगले दल रोज्न दिएको समय पाँच दिन बाँकी रहदा मकवानपुरमा एमालेबाट निर्वाचित २५ जना स्थानीय तहका जनप्रतिनिधिले नेकपा एकीकृत समाजवादी रोजेका छन् ।

निर्वाचन कार्यालयका अनुसार २५ जनामध्ये १ जना गाउँपालिका अध्यक्ष छन् । कैलाश गाउँपालिका अध्यक्ष टंकबहादुर मोक्तानले एमाले छाडेर नेकपा एस रोजेका छन् ।

त्यस्तै हेटौंडा उपमहानगरपालिकाकी उपमेयर मीना लामा र मनहरी गाउँपालिकाकी उपाध्यक्ष मनिला विष्टले पनि नेकपा एस रोजेका छन् । हेटौंडा उपमहानगरपालिका १३ का वडाध्यक्ष मनोजकुमार वाइबाले पनि नेकपा एस रोजेका छन् ।

हेटौंडा उपमहानगरपालिकाका केही वडा सदस्यले पनि नेकपा एस रोजेका छन् । यी बाहेक थाहा नगरपालिका-११ का अध्यक्ष किरणमान बल, ५ का अध्यक्ष विष्णुवहादुर गुरुङले पनि नेकपा एस रोजेका छन् ।

यीबाहेक कैलास गाउँपालिकाबाट अध्यक्ष मोक्तानसहित एकजना वडाध्यक्षले र एकजना सदस्यले नेकपा एसको पक्षमा सनाखत गरेका छन् ।

नेकपा एमालेमा रहँदा माधव नेपाल पक्षमा खुलेका मकवानपुरगढी गाउँपालिकाका अध्यक्ष विदुर हुमागाई र इन्द्रसरोवर गाउँपालिकाका अध्यक्ष जीवन लामा भने अहिलेसम्म नेकपा एसमा खुलिसकेका छैनन् ।

एमालेले स्थानीय तहमा हेटौंडा उपमहानगरपालिकासहित भीमफेदी, ईन्द्रसरोवर, मकवानपुरगढी, कैलाश मनहरी गाउँपालिकामा अध्यक्ष र उपाध्यक्ष जितेको थियो भने बकैया तथा वागमतीमा उपाध्यक्षमात्र जितेको थियो ।

निर्वाचित अधिकांश जनप्रतिनिधि एमालेमै रहने भएका छन् । दुईजना प्रतिनिधिसभा सदस्यमध्ये विरोध खतिवडा र प्रदेशसभा सदस्य मुनु सिग्देल दम्पती नेकपा एसको केन्द्रीय सदस्य भइसकेका छन् ।