राजेन्द्र महतोको दाबी- ओली सरकारले मधेशका माग सम्बोधन गर्न लाग्दा गडबड भयो

जनकपुरधाम । लोकतान्त्रिक समाजवादी पार्टी (लोसपा)का वरिष्ठ नेता राजेन्द्र महतोले अहिले देशमा प्रधानमन्त्री कुर्सीको लडाई मात्र चलिरहेको बताएका छन् ।

मनोकामना युवा कमिटी जनकपुरधाम ११ ले आज बिहान एक कार्यक्रमको आयोजना गरी नेता महतोलाई सम्मान गरेको हो । सोही कार्यक्रममा नेता महतोले भने, ‘देशमा राजनीतिक अवस्था एउटै छ, प्रधानमन्त्री कुर्सीको लडाई । कोही कुर्सी पाउन त कोही कुर्सीबाट हटाउने खेलमा लागेका छन् ।’

एमाले र काँग्रेस होस् वा माओवादी सबै कुर्सी खेलमा लागेको भन्दै नेता महतोले भने, ‘शोषण उत्पीडनको समस्या समाधान गर्न कसैको चासो छैन । हामीले सोचेका थियौं- निर्वाचन भएपछि देशमा विकास हुन्छ । गोली चलाएर लेखेको विभेदकारी संविधान संशोधन हुन्छ । तर, यसतर्फ कुनै गतिविधि अगाडी बढेन । यो चिन्ताको विषय हो ।’

नेता महतोले संकटमा परेका बेला केपी ओलीले मधेस आन्दोलनमा लागेका १३९ जनाको मुद्दा फिर्ता लिएको र अन्य माग सम्बोधन गर्न लागेकै बेला गडबड भएपछि रेशम चौधरी पनि रिहा हुन नसकेको बताए ।