नेपाल-भारत दोस्रो खेलअघि ‘वार्मअप’ मा खेलाडी (तस्बिरहरू)

काठमाडौं । भारतविरुद्ध केही बेरमा नेपालको दोस्रो मैत्रीपूर्ण खेल हुँदैछ ।

साढे ५ बजेबाट खेल शुरू हुँदैछ । त्रिपुरेश्वरस्थित दशरथ रंगशालामा हुने खेलअघि अहिले दुवै टिम वार्मअपमा छन् ।

साफ च्याम्पियनसिपको तयारीस्वरूप नेपाल-भारतको दुई मैत्रीपूर्ण खेल आयोजना गरिएको हो । पहिलो खेल बिहीबार १-१ गोलको बराबरीमा सकिएको थियो । अञ्जन विष्टले ३६औं मिनेटमा गरेको गोलसँगै घरेलु टोलीले अग्रता लिएको थियो ।

तर, दोस्रो हाफमा नेपालमाथि हावी बनेको भारतका लागि सब्स्टिच्युट खेलाडी अनिरुध थापाले ६०औं मिनेटमा गरेको गोलसँगै स्कोरलाइन बराबरीमा आएको थियो । बाँकी समयमा दुवैतर्फबाट गोल हुन नसक्दा पहिलो मैत्रीपूर्ण बराबरीमा टुंगिएको थियो ।

दोस्रो खेलको शुरूआती ११ मा मुख्य प्रशिक्षक अब्दुल्लाह अल्मुताइरीले तीन खेलाडी परिवर्तन गरेका छन् । बिहीबारको टोलीबाट अब्दुल्लाले सुमन अर्याल, नवयुग श्रेष्ठ र अञ्जन विष्टको स्थानमा मनिष डाँगी, आशिष लामा र सुजल श्रेष्ठलाई शुरूआती-११ मा समावेश गरेका छन् ।

यस्तै भारतीय टोलीमा सात खेलाडी परिवर्तन भएको छ । मुख्य प्रशिक्षक इगोर स्टिम्याकले दोस्रो रोजाइका गोलकिपर अमरिन्दर सिंह, प्रितम कोटल, सेरिटोन फर्नान्डेज, अनिरुध थापा, बिपिन सिंह, रहिम अली र ललेङ्मावियालाई मैदानमा उतारेका छन् ।