कांग्रेसले बनायो साइबर सेना- विपक्षी प्रहारको प्रतिवाद गर्न ‘वार रुम’

काठमाडौं । एमालेको सिको गर्दै सत्तारुढ नेपाली कांग्रेसले पनि साइबर संगठन खडा गरेको छ । एमालेले संस्थागत मान्यता नदिए पनि साइबर सेना र आइटी आर्मी गठन भएका छन् ।

त्यसको काउन्टरमा कांग्रेसले नेपाली कांग्रेस वाइड इन्फरमेसन नेटवर्क (एनसी वीन) गठन गरेको हो । कांग्रेसको सूचना,संचार तथा प्रचार विभागको सोमवार भर्चुअलरूपमा सम्पन्न भएको बैठकले एनसी वीन गठन गरेको हो ।

प्रवक्ता विश्वप्रकाश शर्मा नेतृत्वको सो समितिको बैठकले प्रविधीमैत्री कांग्रेसको लागि इन्जिनियर दिपेश विष्टको संयोजकत्वमा २७ सदस्यीय एनसी वीन गठन गरेको छ । यसका संरचना सातै प्रदेशमा रहने विभागका सचिव दिनेश थापा मगरले विज्ञप्ति मार्फत जनाएका छन् ।

एनसी वीनले तत्कालका लागि तीनै तहको आगामी निर्वाचनमा प्रविधि र आन्तरिक रणनीतिर्फत विपक्षीको प्रहारको प्रतिवाद गर्नेछ । वार रुमको संगठित अवधारणाबमोजिम पार्टीको प्रचार र विपक्षीमाथि प्रहार हुने उनले बताएका छन् ।

दीर्घकालीन रूपमा भने यसले पार्टीको विभिन्न तहलाई प्रविधि मार्फत सहज बनाउँदै सामाजिक संजालबाट प्रचार गर्नेछ ।